Semeılik oqýshylar nysandardy jylytýdyń tyń ádisin usyndy
Muny Semeı qalasyndaǵy fızıka-matematıka baǵytyndaǵy Nazarbaev zııatkerlik mektebiniń 11-synyp oqýshylary Nurjan Bódes pen Jansaıa Qanaǵatova dáleldedi. Osylaısha olar kúndelikti qoldanystaǵy kómir, elektr, suıyq otynnyń ornyn az mólsherdegi toqpen almastyrdy.
«Biz «Jartylaı ótkizgishterdi turmysta qoldaný» taqyrybyndaǵy jobamen sońǵy bir jarym jyldan beri fızıka pániniń muǵalimi Zamıra Mamadılovanyń jetekshiligimen aınalystyq. Respýblıkalyq saıysta osy jobany otandyq fızıka salasynyń ǵalymdary aldynda dáleldep, sátti qorǵadyq. Qazir álem nazary bolashaqtyń energııasyna aýyp otyr. Demek, bizdiń joba eń ózekti máseleniń jańa bir sheshimin tapty desek artyq aıtpaımyz. Endigi josparymyz osy jobamyzdy jetildirip, iske qosý, ıaǵnı qoldanysqa engizý», -deıdi qos shákirt.
Qos shákirt óz jańalyqtaryn kópshilikpen jalpy bilim beretin pánder boıynsha respýblıkalyq ǵylymı jobalar saıysynda bólisti. Almaty qalasynda ótken saıys «Daryn» respýblıkalyq ǵylymı-praktıkalyq ortalyǵy uıymdastyrýymen ótti. 4 baǵyt boıynsha ótkizilgen saıystyń sońǵy kezeńine 700-den astam oqýshy qatysyp, 592 ǵylymı jumystar kórsetilgen.
Óndiriske tyń jańalyq engizýge talpynǵan Nurjan men Jansaıanyń jańalyǵy qazylar alqasy tarapynan joǵary baǵalanyp, respýblıkalyq saıystyń ІІ dárejeli dıplomy men kúmis medali tabystaldy.
Shynar Ǵalymbekqyzy
