Semeılik oqýshylar dombyrashy robot qurastyrdy

SEMEI. QazAqparat - Semeıde fızıka-matematıka baǵytyndaǵy Nazarbaev Zııatkerlik mektebiniń ınformatıka páni muǵalimi Baqytbek Orynbaev pen oqýshylar Mıras Muratqanov, Nurbol Maqtaev dombyrada oınaı alatyn robot qurastyrdy, dep habarlaıdy QazAqparat bilim oshaǵynyń baspasóz qyzmetine silteme jasap.

Ónertapqyshtar bul eńbekterin Abaıdyń 175 jyldyǵyna arnap otyr.

«Ár oqý jyly bastalarda aldymyzǵa maqsat qoıamyn. Ortaq oıymyz jańa bir týyndyny jasap, qurastyrý arqyly mektep oqýshylaryn shyǵarmashylyqqa elitý, olardyń qyzyǵýshylyǵyn arttyrý. Robotqa dombyramen kúı tarttyrý ıdeıasy biraz ýaqyt oıda júrdi. Sáti osy ýaqytta túsip otyrǵan jobany júzege asyrýǵa tolyq 1 aı ýaqyt jumsadyq. Aldymen robotty qurastyryp, sodan-soń olardyń perneni basýshy, ishekti qaǵýshy sııaqty árbir bólikterin jeke-jeke jasadyq», –deıdi Zııatkerlik mektep muǵalimi, joba jetekshisi Baqytbek Nurlybekuly.

Kúıshi robotty qurastyrýshylardyń sózine qaraǵanda, buǵan deıin osyǵan uqsasy bolǵan. Tek ol bir kúıdi oryndaýmen ǵana shekteletin. Al, myna jańa qurylǵy dombyradaǵy barlyq perneni erkin basyp, ishekti qalaýynsha qaǵa alý artyqshylyǵyna ıe. Al eger kúıdi oryndaýda qatelikter bolsa, onda proportsıonaldy dıfferentsıaldaýshy rettegish arqyly ózi eseptep, rettep otyrady.

Robot dombyrada kúıdi kompıýterge engizilgen notalar arqyly oryndaıdy. Qurastyrýshylar kúıdiń oryndalý jyldamdyǵyn da qalaýynsha ózgertýlerine qol jetkizgen. Endi qazirdiń ózinde joba dana Abaıdyń «Torjorǵa», halyq kúıi «Qara jorǵa» men halyq áni «Erkem-aıdy» oryndaı alady. Ustaz ben shákirtter óz týyndylarynyń kez kelgen shyǵarmany nota arqyly oryndaýǵa qaýqarly ekenine senimdi.

Esterińizge salsaq, Baqytbek Nurlybekuly buǵan deıin 2018 jyldyń túlegi Ádil Ordaev esimdi oqýshysymen birlesip qultemirge qara jorǵa bıletken edi. Endi mine taǵy bir tyń jańalyǵymen jurtshylyqty tańǵaldyrýda.