Semeılik oqýshylar 3 myń rýbık tekshesinen Álıhan Bókeıhannyń portretin jasady

ÓSKEMEN. QazAqparat – Semeı qalasynda oqýshylar 3 myń rýbık tekshesinen Alash kósemi Álıhan Bókeıhannyń panno portretin jasap shyqty, dep habarlaıdy QazAqparat tilshisi.

31 mamyr – Saıası qýǵyn-súrgin qurbandaryn eske alý kúnine oraı qolǵa alynǵan bastamaǵa Semeıdegi Qazaq ınnovatsııalyq gýmanıtarlyq-zań ýnıversıteti muryndyq bolyp otyr.

«Buǵan deıin «Qazaqstan spıdkýbıng federatsııasy» qoǵamdyq birlestigi ókilderiniń 9 mamyrda mergen qyz Álııa Moldaǵulovanyń portretin rýbık tekshesinen jasaǵanyn kórgen bolatynbyz. Sóıtip, Saıası qýǵyn-súrgin qurbandaryn eske alý kúninde qoǵam jáne memleket qaıratkeri Álıhan Bókeıhannyń portretin jasatý jaıly oı týdy. Bundaǵy maqsat – Alash ardaqtysyn óskeleń urpaqqa nasıhattaý, jastarǵa messendj jasaý», - dedi ýnıversıtettiń gýmanıtarlyq fakýltet dekanynyń orynbasary Azamat Azatov.

Onyń aıtýynsha, panno portretke 3 myń rýbık tekshesi ketken. Salmaǵy – 450 keli, bıiktigi – 3,4 metr, eni – 2,8 metr. 6 oqýshy ony 8 saǵatta jasap shyǵypty.

Esterińizge sala ketsek, osyǵan deıin Óskemende Shákárim Qudaıberdiulynyń bıýsti ashylǵanyn habarlaǵan bolatynbyz.