Semeılik oqýshy Reseıden júldemen oraldy
SEMEI. QazAqparat - Reseıdiń Sankt-Peterbýrg qalasynda hımııa páninen 53-shi halyqaralyq Mendeleev olımpıadasynan semeılik oqýshy júldemen oraldy, dep habarlaıdy QazAqparat.
Olımpıadaǵa álemniń 30 elinen jas hımıkter komandalary kelip, óz elderiniń namysyn qorǵady.
Qazaqstan namysyn respýblıkalyq olımpıadanyń jeńimpazdary men júldegerleri, sondaı-aq oqý-jattyǵý jıyndarynda birneshe ret daıyndyqtan ótken 8 oqýshy qorǵady.
Solardyń biri Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebiniń 12 synyp oqýshysy Rústem Sherdebaev. Jarysta ol jaqsy nátıje kórsetip, qola medal jeńip aldy.
«Reseıdegi bilim báıgesi men úshin úlken tájirıbe boldy. Olımpıada eki kezeńge bólingen, árqaısy 5 saǵattan turdy. Biz bul olımpıadada teorııalyq jáne tájirıbelik kúrdeli jattyǵýlardy oryndadyq. Júldegerler qatarynan kórinip, elimizdiń atyn shyǵarýǵa qosqan azdy-kópti úles úshin maqtanamyn. Hımııa pánin tereń túsinýge óz bilgenderin aıamaı janyn salyp júrgen ustazdaryma úlken alǵysymdy aıtamyn» -deıdi Rústem.
Jalpy Rústem buǵan deıin Aqtóbe qalasynda ótken respýblıkalyq olımpıadaǵa qatysyp, 2 -oryn alǵan. Budan bólek ótken jyly A.Bekturov atyndaǵy ІV Halyqaralyq hımııa olımpıadasynda ІІІ orynǵa ıe bolǵan. Al 2013 jyly «Tarıh» páninen URFODU ǵylym negizderi boıynsha IX Halyqaralyq olımpıadada II dárejeli dıplommen marapattalǵan.
