Semeılik oqýshy óz kúshimen jıhaz tsehyn ashyp, kásibin dóńgeletip otyr
ASTANA. QazAqparat - Semeı qalasynyń oqýshysy grant utyp alyp, jıhaz túrlerin shyǵarýda, dep habarlaıdy QazAqparat tilshisi Bilim jáne ǵylym mınıstrliginiń baspasóz qyzmetine silteme jasap.
«Qazaq gýmanıtarlyq-zańgerlik ınnovatsııalyq ýnıversıtet Semeı qalasynyń oqýshylary arasynda kásipkerlik salany órkendetý úshin dástúrli túrde «Startup Battle» baıqaýyn ótkizip keledi. Osy baıqaýdyń jeńimpazdarynyń biri, №30 orta mektepte oqıtyn 11 synyp oqýshysy Nadır Sábıtov grant utyp alyp, qańqasyz jıhaz óndirý boıynsha óz bıznesin ashqan», - delingen vedomstvonyń saıtynda.
Oqýshynyń ózi baıqaýda qalaı jeńiske jetkenin aıtyp berdi.
«Qazaq gýmanıtarlyq-zańgerlik ınnovatsııalyq ýnıversıtetiniń bıznes-ınkýbatoryndaǵy «Fox» oqytý ortalyǵyndaǵy semınarlardan qalmaı marketıng, satý jáne dızaın salasyndaǵy bilimimdi shyńdadym. Semeı naryǵyn jaýlaýǵa osy bilimim kóp kómektesti. Qazir basqa jaqtan resýrs tarta otyryp, jyldam ósim úshin ınvestıtsııalyq model qurýdamyz», - deıdi Nadır Sábıtov.
Onyń dúkeni shyǵaratyn túkti qaptarǵa suranys joǵary boldy. Qazir jas kásipkerdiń shtatynda úsh adam bar: eki tiginshi jáne bir assıstent.
Nadırdiń aıtýynsha, kóp uzamaı jıhazdardy Óskemen men Pavlodar turǵyndaryna satý kózdelip otyr. Sodan keıin jigerli jas kásipker tipti Qazaqstan naryǵynan asyp, TMD elderine kirýdi josparlaýda.
