Semeılik neırohırýrgter jańa ádispen kúrdeli otany sátti jasady

SEMEI. QazAqparat – Semeı qalasyndaǵy jedel medıtsınalyq járdem aýrýhanasynyń neırohırýrgteri úshkil júıke nevralgııasy dıagnozy qoıylǵan naýqasqa kúrdeli ota jasady, dep habarlaıdy QazAqparat tilshisi.

«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetine súıensek, semeılik neırohırýrgter úshkil júıke nevralgııasy bar naýqastardy emdeýdiń jańa ádisin engizdi. Búginde MÁMS júıesi aıasynda alǵashqy eki naýqasqa sátti ota jasaldy. Onyń biri – 60 jastaǵy Jupar Ysqaqova.

«Aýyr patologııadan mashaqat tartyp kete jatqanyma 11 jyl boldy. Óne-boıym aýyrsynyp, ishten kúıip jatqandaı bolady. Sonyń saldarynan júrip-turýdan qaldym. Tipti durys jýyna almaı, tamaq ta ishe almadym. Osynshama jyl boıy kúlý degenniń ne ekenin de umyttyq», - deıdi ol.

Aýrýhanadaǵy neırohırýrgııa bóliminiń meńgerýshisi Altaı Qultýmanovtyń aıtýynsha, bul syrqat kóbinese 50-70 jastaǵy áıelderde kezdesedi.

«Úshkil júıke nevralgııasyn emdegen kezde kóbinese basynda aýyrsynýdy jeńildetý úshin dári-dármekter qoldanylady. Alaıda onyń áseri qysqa merzimdi. Sol úshin aýrýdy hırýrgııalyq jolmen emdeý qajet. Naýqasqa ota sátti jasaldy. Endi biz engizgen jańa tehnologııa osy dertke shaldyqqan oblys turǵyndaryna kómegin tıgizedi dep úmittemiz», - deıdi ol.

Qazir Jupar Ysqaqova ózin jaqsy sezinedi. Zeınetker óz sózinde dárigerlerge kásibı sheberlikteri úshin shynaıy alǵysyn bildirdi.

«Osy jyldar boıy qaıda baryp em izdemedim deısiz. Otadan soń aýyrsynýlar basylyp, ózimdi sondaı baqytty sezinip turmyn. Barlyǵy tegin bolyp, esh shyǵyn shyǵarmadym. Aq halatty abzal jandarǵa rızamyn!», - deıdi áıel.