Semeılik músinshiniń týyndylaryna suranys joǵary
SEMEI. QazAqparat - Semeılik 35 jastaǵy Nurbol Qalıev músinshi-sýretshi. Ol músinderdi soǵýmen 13 jyldan beri aınalysyp keledi. Kóbine monýmentaldy músinder, dep habarlaıdy QazAqparat.
Bala kezinen músinshi bolýdy armandap, osy salanyń qyr-syryna qanyǵý úshin aldyna úlken maqsattar qoıady. 5 synyptan 9-shy synypqa deıin Kórkemóner mektebinde bilim alady. Keıinnen 1997 jyly respýblıkalyq Kórkemóner kolledjine oqýǵa túsip, aıaqtaǵannan keıin (2000 jyly) Qazaq Ulttyq óner akademııasynda «Keskindeme jáne músin» mamandyǵy boıynsha bilimin jetildiredi.
Týǵanynan ónerdiń erekshe túrine qyzyǵýshylyq tanytqan Nurboldyń búgingi kúni qolynan shyqqan 10-ǵa jýyq týyndysy bar.
«Músin jasaýǵa qyzyǵýshylyǵym bastaýysh synypty oqyp júrgende bastaldy. Osyny baıqaǵan ata-anam meni Kórkemóner mektebine berdi. Osylaı talabymdy ushtadym. Qazir bala kezdegi maqsatyma jettim. Ózimdi tipti basqa salada elestetip kórgen emespin»,-deıdi Nurbol.
Jas músinshiniń qolynan shyqqan monýmentteri Astana, Almaty, Baqanas sııaqty birqatar qalalardyń kóshelerinde tur. Al Shyǵys Qazaqstan oblysynda 3 monýmenti ornalasqan eken. Solardyń biri Abaı aýdanynyń Qaraýyl aýylynda uly Abaıdyń əkesi Qunanbaı Óskenbaıulynyń eskertkishi. Balqashtyń mysynan quıylǵan týyndynyń salmaǵy 12 tonna, bıiktigi tuǵyrymen alǵanda 7 metr. Nurbol eskertkishti jasaýǵa 10 aı ýaqyt jumsaǵan. Taǵy bir úlken týyndysy Jarma aýdanynda «Týǵan jer» baǵdarlamasy aıasynda zańǵar jazýshy Muhtar Áýezovke ornatylǵan eskertkish. Mystan jasalǵan músinniń bıiktigi tuǵyrymen alǵanda 6 metr. Jas músinshi bul týyndyny da jasaýǵa birneshe aı ýaqytyn jumsapty. Aıagóz qalasynda turǵan áıgili jyraý, batyr Aqtamberdi Saryulynyń eskertkishi de Nurboldyń qolynan shyqqan.
«Kóbine músinderdi qola, granıt tas pen mystan jasaımyn. Kólemi men sapasyna baılanysty ártúrli ýaqyt ketedi. Keıde bir eskertkish jasaý úshin birneshe adam birigip isteımiz. Úlken shydamdylyq kerek. Bir etaptyń ózi birneshe apta, kúnnen turady jáne fantazııa, ıdeıa myqty bolý kerek. Óıtkeni, músinshi óz eskertkishi arqyly halyqty tərbıeleıdi»,-deıdi músinshi.
Qazir Nurbol Shyǵys Qazaqstan oblysy Zaısan qalasynda ornatylatyn Baımurat batyr eskertkishin jasap jatyr.
