Semeılik qyzdar aralas jekpe-jekten Azııa chempıonatynan jeńispen oraldy
SEMEI. QazAqparat - Taıland astanasy Bangokta MMA aralas jekpe-jekten Azııa chempıonatynan semeılik boıjetkender júldemen oraldy, dep habarlaıdy QazAqparat Semeı aqparattyq ortalyǵyna silteme jasap habarlaıdy.
Sary qurlyq úzdikteri jınalǵan baıraqty báseke, Qazaqstan quramasynyń jalpy eseptegi jeńisimen aıaqtaldy. Ulttyq qurama namysyn qorǵaǵan Shákárim ýnıversıtetiniń stýdenti Talshyn Jumataeva Azııa chempıony atansa, Qazaq ınovatsııalyq gýmanıtarlyq-zań ýnıversıtetinde bilim alatyn Shynar Júsipova qola júldeni qanaǵat tutty.
«Sportqa bala kúnimnen beri qyzyǵamyn. Oqý bitirgennen keıin de sportta qalsam degen oıym bar. Osy sportqa degen qyzyǵýshylyǵym myqty qarsylastarǵa tótep berip, alǵa qaraı jyljýyma múmkindik berdi dep oılaımyn», - dedi Azııa chempıony Talshyn Jumataeva.
Sportshylardyń jattyqtyrýshysy Sansyzbaı Saıldınov bul nátıje ShQO MMA federatsııasynyń jalpy jeńisi ekenin atap ótti.
«Osy jarysta bizdi qoldaǵan azamattarǵa alǵysymdy aıtqym keledi. Jattyǵý úshin barlyq jaǵdaılar jasaldy. Osy qyzdardyń jeńisiń kórip jattyǵý zalyna kóptegen jastar kelip jatyr. Alda bolatyn álem chempıonatyna tyńǵylyqty daıyndyq júrgizip, el namysyn joǵary deńgeıde qorǵaýǵa tyrysatyn bolamyz», - dedi S. Saıldınov.
Azııa birinshiliginde top jarǵan Talshyn Jumataeva endi MMA-dan Eýropa jáne Álem chempıonatynda el namysyn qorǵaıtyn bolady.
Aıta keteıik, ShQO sportshylary tarıhta alǵash ret MMA boıynsha Azııa chempıonatynyn júldelerine qol jetkizip otyr.
