Semeılik kásipker óńirlerde spıdkýbıng úıirmelerin ashýdy josparlaýda

SEMEI. QazAqparat - Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyń «Týǵan jer» baǵdarlamasy aıasynda Semeıde demeýshilerdiń qoldaýymen birqatar jumystar atqarylýda. Ásirese, el bolashaǵy sanalatyn jastarǵa qoldaý kórsetip, demeýshilik tanytyp kele jatqan jeke kásipkerdiń biri Arman Mashımov, dep habarlaıdy QazAqparat.

Arman birneshe jyldan beri áleýmettik jaǵynan az qamtylǵan otbasylarǵa qaıyrymdylyq jasap, qalada ótetin túrli sharalarǵa  demeýshilik kórsetip júrgen jandardyń biri. Jeke kásipker halyqtyń áleýmettik problemalaryn sheshýdi kózdeıdi. 

2017 jyly Armannyń demeýshiligimen ózi bilim alǵan Semeı qalasynyń Shyǵys kentindegi № 12 mektep janynan stadıon ashyldy. Munda kent balalary úshin fýtbol, basketbol alańdary, júrgirý jolaǵy, sekirtpe jol, týrnıkter bar. Búginde 100-ge jýyq kent balasy fýtbolmen aınalysyp, bos ýaqyttaryn sportqa arnaýda. Balalardyń sportpen shuǵyldanýyna barlyq jaǵdaı jasalǵan alań nebári 3 aıda salynyp bitken. Al stadıonnyń jalpy quny 18 mln teńge. 

«Fýtbol alańyn ashýǵa maǵan dostarym da kómektesti. ıAǵnı, synyptastarym, tanystarym, joldastarym qolynan kelgenshe qoldaý kórsetti. Stadıondy salýǵa shamamen 18 mıllıon teńge jumsaldy. Onyń 17, 5 mıllıon teńgesin men qalǵanyn dostarym berdi. Stadıon salamyn dep aıtqanda kópshiligi bos sóz dep qabyldady. Salynyp bolǵan soń, ashylýy saltanaty aldynda stadıondy kelip kórdim. Sol kezde kent balalarynyń fýtbol oınap, taǵy bireýleri dene jattyǵýlaryn jasap jatty. Sol kezdegi olardyń júzindegi kúlki maǵan erekshe qýanysh syılady»,  - deıdi Arman.

Sonymen qatar Arman bıyl rýbık tekshesin jyldamdyqpen jınaýdanótken halyqaralyq jarystyń Semeı qalasynda ótýine yqpal etti.
Maýsym aıynyń 7-9 aralyǵynda ótken birinshilikke Qazaqstannyń barlyq óńirlerinen ózge Gollandııa, Reseı, Belarýs, Ózbekstan, Irannan  5 pen 39 jastaǵy  136 úmitker keldi.  Jarys WCA  álemde spıdkýbıngti damytýmen aınalysatyn kommertsııalyq emes uıym bekitken 18 tártip boıynsha ótti. Jarys barysynda shetelden kelgen spıdkýbıng rekordshylar sheberlik saǵattaryn ótkizdi.
Al Armanǵa rýbık tekshesin qurastyrýdan jarystardy uıymdastyrýǵa uly bastamashy bolǵan eken. 2015 jyly uly Belorýssııada spıdkýbıngten ótken jarysqa qatysyp, 10 jasynda rekord ornatypty. Biraq ol  elimizde nelikten osyndaı jarystardyń ótpeıtinin aıtqan. Sodan keıin Arman spıdkýbıngti elimizde damytýdy qolǵa aldy.

«Óskeleń urpaq úshin rýbık tekshesin qurastyrýdan álemdik rekordtarshylarmen birge óner kórsetý mańyzdy dep oılaımyn. Jáne bul sport túrinen balanyń qııaly damyp, este saqtaý qabileti artady.  Sondyqtan   ótken jyly Semeı qalasy ákimdiginiń, Bilim bóliminiń qoldaýymen qaladaǵy birneshe mektepte úıirmeler ashtyq.  Rýbık tekshesin qurastyrýmen aınalysatyndardyń sany artýda. Al Qazaqstan boıynsha eń kóp spıdkýber Semeıde turady», - dedi ol.

Armannyń negizgi  maqsaty - balalardyń bos ýaqytyn tıimdi uıymdastyrý.  Sondyqtan aldaǵy ýaqytta elimizdiń basqa  óńirlerinde de spıdkýbıngten úıirmelerdi ashýdy josparlaýda.