Semeılik ǵalymdar erekshe belbeý oılap tapty

ASTANA. QazAqparat - Shokqa qarsy pnevmatıkalyq jambas belbeýi - bul Semeı qalasynyń Memlekettik medıtsına ýnıversıteti ǵalymdarynyń kóp jylǵy izdenisteriniń nátıjesi. Ol jambas jaraqatynan keletin ólim-jitim men múgedekti aldyn alýǵa baǵyttalǵan medıtsınalyq qurylǵy. Bul týraly altaynews jazady. 

Jambas súıekteriniń zaqymdanýy - bul eń aýyr jaraqat túriniń biri. Qıyndyǵy sol, onyń saldarynan kóp mólsherde qan ketip, adam qatty aýyrsynýy yqtımal. Qazaqstanda tirkeletin ólimniń úshten bir bóligine osy sebep. Jaǵymsyz kórsetkishti túsirý maqsatynda medıtsına ýnıversıtetiniń oqytýshylary jáne dárigerleri arnaıy qurylǵyny oılap tapty. Onyń kómegimen aýrýdy asqyndyrmaı aldyn alýǵa bolady eken.

Ǵylymı joba 2016-2019 jyldarǵa arnalǵan «Densaýlyq» baǵdarlamasy aıasynda qolǵa alyndy. Osy arqyly respýblıkadaǵy jedel medıtsınalyq kómekti jetildirý kózdelgen. Arnaıy apparat Bilim jáne ǵylym mınıstrligi taǵaıyndaǵan grant esebinen ázirlenip otyr.

Qurylǵy - uzyndyǵy 110 sm jáne eni 30 sm-di quraıtyn qospaly matadan turady. Sol sııaqty oń jáne sol jaǵynda arnaıy qaltashalary jáne aýa aıdaǵysh sorǵysy bar. Budan basqa belbeý monometrmen qamtylǵan. Ol manjettegi aýa qysymyn qadaǵalaýǵa múmkindik beredi.

Medıtsınalyq ónim óziniń tıimdiligin kórsete bastasa, ony jappaı óndiriske engizý josparlanýda. Ideıanyń negizgi avtorlary medıtsına ǵylymdarynyń doktory, joǵary sanattaǵy travmatolog-ortoped dáriger Ersin Júnisov, sondaı-aq Astanadaǵy №1 qalalyq aýrýhanasynyń polıtravma bóliminiń meńgerýshisi Rýslan Botaev.

Mýltıortalyqtyq zertteý sheńberinde pnevmatıkalyq belbeýdi Pneumatic anti-shock pelvic belt (PAPb) Astana, Almaty jáne Semeı qalasyndaǵy jedel medıtsınalyq kómek stantsııasynyń jumysyna, sol sekildi atalǵan shaharlardaǵy aýrýhanalardyń qabyldaý bólimderine engizý qarastyrylyp otyr. Aıta keteıik, jambas jaraqaty ásirese jol-kólik oqıǵalarynda jıi oryn alady. Sol sebepti osy biregeı apparatpen aq halattylar aýyr jaraqattardyń sanyn azaıtýdy josparlaýda.