Semeılik dárigerlerge jańa páterlerdiń kilti tapsyryldy
SEMEI. QazAqparat – Konstıtýtsııa kúni qarsańynda Semeıde 15 medıtsınalyq qyzmetkerge jańa baspananyń kilti tabys etildi, dep habarlaıdy QazAqparat ShQO Aqparat ortalyǵyna silteme jasap.
Bıylǵy jyly Qaraǵaıly aýdanynda turǵyn úıler salynyp, áleýmettik ınfrastrýktýra damýda, 5 600 orynǵa arnalǵan «Abaı-arena» zamanaýı mádenı-sporttyq kesheniniń qurylysy aıaqtalýda taqaý. Keshenniń jáne jalpy shaǵyn aýdannyń qurylysymen tanysýǵa Shyǵys Qazaqstan oblysynyń ákimi Danıal Ahmetov keldi. Oblys basshysy keshendi qarap shyǵyp, qurylysshylardyń jumysyna oń baǵa berdi.
«Jarty jyldyń ishinde Semeıdiń bolashaǵy bar aýdanynda jańa turǵyn úıler salynyp bitti. Sol úılerdegi 15 páterdiń kiltin búgin medıtsına salasynyń qyzmetkerlerine tabystaımyz, sebebi medıtsına – ómirimizdiń mańyzdy aspektileriniń biri. Barlyqtaryńyzdy bul keremet kúnmen jáne jańa qońystaryńyzben quttyqtaımyn!», - dedi Danııal Ahmetov.
«Bizdiń otbasy úshin búgin baqytty kún. Jastarǵa qoldaý kórsetken memleketimizge alǵysym sheksiz. Áýel bastan qoldaýdy sezinip kelemin. Men óz kúshimmen UBT tapsyryp, qajet upaıdy jınaǵan soń medıtsınalyq akademııaǵa grantqa oqýǵa tústim. Qazir baspanamen qamtamasyz etildim», - dedi №2 qalalyq aýrýhana bólimshesiniń balalar dárigeri Anton Ramm.
Іs-sharanyń saltanatty bólimi aıaqtalǵan soń oblys ákimi bir-eki páterge kirip shyǵyp, turǵyndardy quttyqtady.
