Semeılik azamattyq nekedegi áıelin pyshaqtap óltirdi
SEMEI. QazAqparat - Azamattyq nekedegi áıelin pyshaqtap óltirgen semeılik 12 jylǵa bas bostandyǵynan aıryldy. Bul týraly QazAqparat ShQO Qylmystyq ister jónindegi mamandandyrylǵan aýdanaralyq sotynyń baspasóz qyzmetine silteme jasap habarlaıdy.
31 jastaǵy B. Lojkın súıiktisi S. Afonınamen 2012 jyldan bastap azamattyq nekede turǵan. 2017 jyly eki ǵashyq arasynda janjal týyndap, áıel ákesiniń úıine qaıtyp barady. Arada jyl ótkennen keıin Lojkın Afonınamen qaıta tatýlasyp, ara-qatynastaryn jalǵastyrady. Biraq ol áıeliniń basqa azamatpen kóńil jarastyryp júrgenin biledi.
Qandy oqıǵa 2018 jyldyń 17 naýryzynda bolǵan. B.Lojkın óz úıinde anasy E. Belıaevskaıamen birge ishimdik ishedi. Keıin ishimdikke qyzyp alǵan ol áıeline birneshe ret habarlasady. Biraq áıeli telefon tutqasyn kótermegen. Qyzǵanyshqa boı aldyrǵan ol keshki saǵat 21.00-de asúı pyshaǵyn alyp, áıeldiń úıine barady. Esikti ashqan aǵasyna qaryndasyn shaqyrýdy suraıdy. Al kelinshek dalaǵa shyqqan kezde birden moınynan qylqyndyryp, keýde tusynan 3 ret pyshaq suǵyp alǵan. Áıel sol jerde kóz jumǵan.
Sot úkimimen B.Lojkın 12 jylǵa bas bostandyǵynan aıyryldy jáne 3 mln teńge moraldyq shyǵyn tóleıdi.
