Semeılik alaıaq bógde bireýdiń páterin satyp jibergen
SEMEI. QazAqparat – Semeı qalasynda bógde bireýdiń páterin 14 mıllıon teńgege satqan alaıaq ustaldy, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, taıaýda polıtsııa bólimshesine habarlasqan er adam Raýshan esimdi tanysynyń Shákárim dańǵylyndaǵy 4 bólmeli páterdi satatyndyǵyn aıtyp, 14 000 000 teńgesin alǵanyn aıtqan.
«Páterdi satyp aldym dep oılaǵan azamat sonda kóship bardy. Alaıda birneshe kúnnen keıin úı ıeleri kelip qalǵan. Olar páterdiń satylmaǵandyǵyn aıtyp, úıdi bosatýyn talap etti», - delingen vedomstvo málimetinde.
Jedel izdestirý sharalary barysynda krımınaldyq polıtsııa bóliminiń qyzmetkerleri kúdiktini qolǵa túsirdi. Buryn sottalǵan 32 jastaǵy qala turǵyny aqshany jumsap úlgergen. Ol óz kinásin moıyndap otyr. Qazirgi ýaqytta tártip saqshylary Qazaqstan Respýblıkasy Qylmystyq kodeksiniń 190-baby 4-bóligi (Alaıaqtyq) boıynsha sotqa deıingi tergeý amaldaryn júrgizýde.
