Semeıge úsh kúnde bir aılyq jaýyn jaýdy
SEMEI. KAZINFORM – Semeıde úsh kúndik jaýyn-shashyn mólsheri bir aılyq normadan asty. Tolassyz jaýǵan nóser saldarynan kósheler men aýlalardy sý basyp, jergilikti turǵyndardy ábigerge saldy. Áleýmettik jelilerde shaǵymdanǵan halyq bul jaǵdaıǵa narazy ekenin bildirip jatyr.
— Glınkı kóshesinde joldy sý basyp ketti. Bir kún ǵana jańbyr jaýsa, túsinýge bolar edi. Al úsh kún boıy kommýnaldyq qyzmetterdiń esh áreket etpeýi — túsiniksiz. Bul másele jyl saıyn qaıtalanady. Jaıaý júrginshige de, kólikke de jol joq. Qozǵalys múlde qıyndap ketti, — deıdi jeli qoldanýshylarynyń biri.
Jergilikti ákimdik bolsa merdiger uıymdar qala kóshelerinen jańbyr sýyn soryp shyǵaryp jatqanyn aıtady. Qazir jedel jumystarǵa qala boıynsha tek 10 tehnıka tartylǵan.
— Jumys tek qalanyń ortalyǵynda ǵana emes, shet aımaqtarynda da júrgizilip jatyr. Jumys áli de júrip jatyr. Turǵyndardyń aryz-shaǵymy kelip túsken jaǵdaıda jedel túrde mamandar baryp, kómek kórsetip jatyr — deıdi ákimdik.
Jaýyn-shashynnyń áseri tek qala kóshelerimen shektelmeı, bilim berý mekemelerine de keri áserin tıgizip otyr. Vodnyı yqsham aýdanyndaǵy № 34 mekteptiń shatyrynan jańbyr sýy ótip, synyptarǵa aǵyp jatyr.
Jergilikti bilim bólimi bolsa, mektepke kúrdeli jóndeý jumystary kerektigin aıtady. Oǵan qajetti qarajat áli bekitilmegen. Al, oqýshylar bolsa ýaqytsha ekinshi aýysymǵa aýystyrylǵan.
— 2024 jyldyń qyrkúıeginde jobalyq-smetalyq qujattama daıyndalyp, saraptamadan oń qorytyndy alynǵan. Bilim bólimi 2025 jylǵa qarajat bólýge bıýdjettik ótinim bergen. Alaıda qajetti qarjy ázirge bekitilgen joq. Shatyrdan aqqan sý úsh kabınet, dáliz jáne sportzaldyń qabyrǵalaryn búldirgen. Mektep ákimshiligi shatyrdy ýaqytsha bekitý sharalaryn qabyldady. Atalǵan kabınetterdegi oqýshylar ekinshi aýysymǵa aýystyrylyp, mekteptiń basqa bólmelerinde bilim alyp jatyr, — deıdi jergilikti bilim bólimi.
Aıta ketelik Semeıde balalardy zorlaǵan stýdent ómir boıyna bas bostandyǵynan aıyrylǵan edi.
Aıdana Qaırat