Semeıge sý basý qaýpi tóndi: Turǵyndar evakýatsııalana bastady
SEMEI. QazAqparat - Aýa raıynyń kúrt jylynýy endi Semeı jurtshylyǵyn ábigerge salýda. Ertis ózeniniń deńgeıi kóterilip, arnasynan asty, dep habarlaıdy QazAqparat tilshisi.
Qazir qala irgesindegi Túıemoınaq araly aýdany, Shyǵys, Mırnyı kentterindegi úılerdiń aýlasyn sý basý qaýpi tónip tur. Tasqyn saldarymen kúreske qalanyń barlyq kommýnaldyq mekemeleri jumyldyryldy. Oqıǵa ornyna dereý jetken qala ákimi Ermak Sálimov turǵyndardy sabyrlyqqa shaqyrdy.
«Barlyǵy arnaıy qurylǵan komıssııanyń nazarynda. Biz birneshe aı buryn kóktemgi sý tasqynyna qarsy jumystardy qolǵa alǵanbyz. Qazir qajetti barlyq kúsh jumyldyrylyp jatyr. Jaǵdaı túzeledi. Turǵyndardy alańdamaýǵa shaqyramyn. Oqıǵa ornynda shamamen 20 adam jumys istep jatyr. Barlyǵy baqylaýda», - dedi qala ákimi.
Qazir Túıemoınaq araly aýdanynyń turǵyndary qonaqúıge ornalastyryldy. Jalpy adamdardy evakýatsııalaý úshin qaladaǵy «Týrıst» jáne «Semeı» qonaqúıi men «Stroıtel» demalys bazasy daıyn. Tótenshe jaǵdaı basqarmasy men qalalyq ákimdiktiń mamandary jaǵdaıdy baqylaýda ustaýda.
1 200 adam turatyn 496 úı baqylaýǵa alyndy.
