Semeıge bıyl 187 mlrd teńge ınvestıtsııa tartyldy
Semeı qalasyna jyl basynan beri 187 mlrd teńge ınvestıtsııa tartylǵan, dep habarlaıdy Kazinform.
Abaı oblysynyń ekonomıkalyq kórsetkishi qysqa merzimde 107,5%-ǵa jetti. Negizgi kapıtalǵa salynǵan ınvestıtsııa 141,2% ósip, 475,1 mlrd teńge boldy. Investıtsııanyń qomaqty bóligi, ıaǵnı 187 mlrd teńgeden astamy nemese 39,4%-y Semeı qalasyna baǵyttaldy. Bul týraly oblys ákimi Nurlan Uranhaev qala halqymen kezdesýinde aıtty.
«Qurylys salasynda eń joǵarǵy ósim – 130%, bul ósimniń 42%-y qalanyń úlesinde. Jumys istep turǵan kásipkerlik sýbektileriniń sany 110,3%-ǵa ósti, onyń 56%-y — Semeıde. Ónerkásip ónimderi 109,2%-ǵa ósti, shamamen 32%-y qala kásiporyndarynda óndirildi. Aýyl sharýashylyǵy óniminiń jalpy kólemi 488 mlrd teńgege jetti, onyń 12,4%-y qala aýmaǵyna tıesili», — dedi Nurlan Uranhaev.
Onyń aıtýynsha, shaharda ortasha aılyq jalaqy 17,6% ósip, 292,8 myń teńgege jetken. Injenerlik-kommýnıkatsııalyq jáne kólik ınfraqurylymy qarqyndy damyp keledi.
2023 jyly kólik salasyn jaqsartýǵa 11 mlrd teńge kóleminde qarajat bólindi. 50 shaqyrym jol jelisi jóndeldi. 2025 jylǵa deıin oblystaǵy 800 shaqyrym joldy ortasha jóndeý josparlanǵan.
Óńirdi 2026 jylǵa deıin damytýdyń keshendi jospary aıasynda aspaly kópirdi qaıta jańǵyrtý josparlanǵan.
«Turǵyn úı qurylysynda da aıtarlyqtaı ósim baıqalady. Jalpy aýdany 480 myń sharshy metr nemese 3811 páterlik 68 kópqabatty jáne jeke turǵyn úı salynyp jatyr, onyń 2443-i bıyl paıdalanýǵa berildi. Búginde 285 myń sharshy metrden astam turǵyn úı paıdalanýǵa berildi, onyń 79,5%-y Semeıge tıesili», — dedi Nurlan Uranhaev.
Degenmen 19 myńnan astam adam baspana kezeginde tur, Semeıde — 13 959 adam. 2023 jyly kópbalaly jáne áleýmettik osal otbasylarǵa 134 páter berildi. Aldaǵy úsh jylda jalpy aýdany shamamen 694 myń sharshy metr bolatyn taǵy 148 kópqabatty turǵyn úıdi paıdalanýǵa berý josparlanǵan. Bul 6800 otbasyna óz baspanasyn alýǵa múmkindik beredi.
Semeıde qaldyqtardy suryptaý jelisi bar jańa zamanaýı polıgon salý josparlanǵan. Jumys ınvestorlar esebinen júrgizilip jatyr.
Qalany damytýdyń bas josparyn ázirleý aıasynda oblys ortalyǵynan aýyldyq okrýgterdi bólip, jańadan Jańasemeı aýdanyn qurý josparlanǵan.
