Semeıge 1 vagon gýmanıtarlyq kómek keldi
SEMEI. QazAqparat - Sý tasqynynan zardap shekken semeılik turǵyndarǵa respýblıkamyzdyń ár aımaqtarynan gýmanıtarlyq kómek kelip jatyr. Solardyń birin búgin semeılikter temirjol vokzalynan tosyp aldy, dep habarlaıdy QazAqparat.
Almaty qalasynyń «Teplo» qaıyrymdylyq áleýmettik jobasy jibergen 1 vagon gýmanıtarlyq kómekti «Nur Otan» partııasy qalalyq fılıalynda qurylǵan qabyldaý pýnktiniń qyzmetkerleri tosyp aldy. Zardap shekken turǵyndarǵa jiberilgen kıim-keshek sý astynda qalǵan Mırnyı, Zaton kenti, Bobrovka saıajaıy men Prıstan, Túıemoınaq araly aýdandarynyń turǵyndaryna úlestirilip beriletin bolady.
Aıta keteıik buǵan deıin zardap shekken turǵyndarǵa gýmanıtarlyq kómek jınaý maqsatynda Semeı qalalyq «Nur Otan» partııasy fılıalynda gýmanıtarlyq kómek qabyldaý beketi ashylǵan bolatyn. 
Qazirde qabyldaý pýnktine janashyrlyq tanytqan jurt qoldan kelgen kómekterin berýde. Búgingi kúnge deıin birneshe ret zardap shekken turǵyndarǵa jınalǵan azyq-túlik, kıim-keshek taratylyp berilgen. Al búgin kelgen 100 qorap tolǵan kıimdi eriktiler turǵyndardyń úıine jetkizetin bolady. 
«Búgin Almatydan kómek keldi. Kútip alyp jatyrmyz. Qazir eriktilerden qurylǵan top zardap shekken turǵyndarǵa aparyp beredi. Kómek kórsetip, janashyrlyq tanytyp jatqan barlyq jandarǵa alǵys aıtamyz»,-dedi «Nur Otan» partııasynyń qalalyq fılıaly tóraǵasynyń birinshi orynbasary Zýlfııa Jamaldınova.
