Semeıdiń jańa bas josparynda qandaı jobalar qarastyrylǵan
SEMEI. KAZINFORM — Úkimet basshysy Oljas Bektenov Semeı qalasynyń turǵyndary úshin qolaıly jaǵdaı jasaý jáne abattandyrý jumysyn tekserip, jańa avtomobıl kópiri qurylysynyń barysymen jáne aspaly kópirdi rekonstrýktsııalaý josparymen tanysty.
Oljas Bektenov aspaly kópirdiń astynda ornalasqan oblys ortalyǵynyń sol jaǵalaýyndaǵy jańa qoǵamdyq keńistikti aralap kórdi.
Biregeı joba ómir súrýge qolaıly orta qurý jáne «Adamdarǵa arnalǵan qala» tujyrymdamasyn oryndaý maqsatynda júzege asyrylǵan. Munda barlyǵy 12 myń m2 aýmaq abattandyrylǵan. Jankúıerlerge arnalǵan trıbýnalary bar basketbol jáne fýtbol alańdary bar.
Іs-sharalar men kontsertter ótkizýge arnalǵan amfıteatr men sahna ornatyldy. 250 kóshe shamy ornatylatyn sáýlettik jaryqtandyrý qarastyrylǵan.
1500 m2-den astam qabyrǵaǵa kórkem keskindeme salynǵan. 370 m trotýardy jaılastyra otyryp, 5 myń m2 jer asfalttaldy.
Bul aımaq qala turǵyndary men Semeı qonaqtarynyń, ásirese jastardyń súıikti demalys ornyna aınaldy.
Semeı qalasynyń ákimi Nurbol Nursaǵatov abattandyrý boıynsha aldaǵy jospardy jáne qalanyń jańa bas josparyn ázirleýdiń qazirgi jaǵdaıy týraly baıandady.
Joba ázirlendi jáne keshendi qala qurylysy saraptamasynyń qaraýynda. Bas josparda áleýmettik, rekreatsııalyq jáne óndiristik aımaqtardy qosa alǵanda, oblys ortalyǵynyń aýmaǵyn damytýdyń negizgi baǵyttary negizge alynǵan.
Bıylǵy qyrkúıek aıynda qujatty «Ashyq NQA» portalyna ornalastyrý josparda bar. Budan ári jurtshylyqtyń talqylaýynan ótip, Úkimettiń bekitýine usynylady.
Oljas Bektenov avtomobıl kópirin rekonstrýktsııalaý barysymen tanysty, ondaǵy jumystar 2022 jyly bastaldy.
Jańa tórt jolaqty qurylymnyń jalpy uzyndyǵy — 1,3 km, eni — 23 m. Al 1964 jyly paıdalanýǵa berilgen eski avtomobıl kópiri tek jaıaý júrginshiler qozǵalysy úshin paıdalanylatyn bolady.
Búgingi tańda tirekterdi salý, burǵytoltyrmaly qadalaryn ornatý jáne betondaý jumysy júrgizildi. Barlyǵy 9 tirek pen 8 aralyq salynady.
Sondaı-aq Semeıdiń vızıt kartochkasy — aspaly kópirdi rekonstrýktsııalaý josparlanýda.
Tekserý nátıjesinde obektiniń jaǵdaıy qanaǵattanarlyqsyz dep baǵalandy. Jol tósemin aýystyrý, kabelderdiń ınjenerlik jelilerin qaıta qurý, korrozııany joıý, metall konstrýktsııasyn syrlaý jáne sý burǵyshtardy jóndeý sekildi barlyq qajetti jóndeý jumystary eskerilgen jobalaý-smetalyq qujattama ázirleý satysynda.
Semeı oblys ortalyǵy mártebesin alǵannan keıin munda kólik quraldarynyń qozǵalysy edáýir artty.
Qalany Ertis ózeni qaq jaryp ótedi, al eki jaǵalaýdy baılanystyratyn kópirler kólik qatynasynyń qarqynyn arttyrýǵa yqpal etedi.
Bul rette aspaly kópir Semeı qalasynyń ajary bolyp sanalady. Búgingi tańda TMD elderiniń eshqaısysynda da osyndaı qurylystar joq.
Osyǵan baılanysty Úkimet basshysy rekonstrýktsııalaý jumystaryn belgilengen merzimde aıaqtaý úshin birqatar tapsyrma berdi.
Semeı aınalma jolyn salýdyń mańyzdylyǵyna erekshe nazar aýdaryldy. Bul rette uzyndyǵy 51,5 km ІІ tehnıkalyq sanattaǵy aınalma jol Semeı qalasynyń batys jaǵynan qarastyrylǵan. Eki jolaqty qozǵalys, 6 kólik jol aıryǵyn, 3 kópir men 2 jol ótpesin salý josparlanýda.
Oblys ortalyǵy halyqaralyq avtomobıl joldary ótetin tranzıttik qala bolyp sanalady. Osyǵan baılanysty Semeı — Pavlodar, Semeı — Kýrchatov, Semeı — Almaty jáne Semeı — Óskemen avtojoldaryn jalǵaıtyn kósheler men tranzıttik dálizdi jeńildetý qajet.
Abaı oblysynyń ákimdigine Kólik, Qarjy jáne Ulttyq ekonomıka mınıstrlikterimen birlesip atalǵan jobany iske asyrý máselelerin pysyqtaý tapsyryldy.
