Semeıdiń keı kóshelerinde halyq áli de sýsyz otyr

CEMEI. KAZINFORM – Semeı qalasynda sý qubyrlaryn josparly dezınfektsııalaý jumystarynan keıin barlyq úıge áli sý qosylmady.

Keı yqshamaýdandarda sý bir táýlikten astam ýaqyt boıy berilmeı tur.

– Gete kóshesindegi úılerde sý krannan áreń aǵady. Sý toqtatylardyń aldynda-aq qysym azaıa bastaǵan edi. Qaıta qosylǵannan keıin múlde nasharlap ketti, – deıdi qala turǵyndary.

Turǵyndardyń aıtýlarynsha, 35 shaǵynaýdanda sý múlde joq. Buǵan qatysty kommýnaldyq kásiporynnan túsinikteme berdi.

– Qubyrlar men aýyzsý júıeleri jylyna eki ret jýylyp, dezınfektsııalanady. Sonyń barysynda qubyrlardyń ishindegi tot, maı qaldyqtary tazalanyp, jylytý maýsymyna daıyndyq jasalady. Dezınfektsııalaý úshin quramynda hlory bar eritindi paıdalanylady. Ol qubyrlarda 24 saǵat boıy saqtalady, – dep habarlady «Semeı Vodokanal» KMK-dan.

Kásiporyn málimetinshe, qazir oń jaǵalaýdaǵy barlyq úıge sý berilgen. Alaıda jekelegen úıler men keı shaǵynaýdandarda sý qysymynyń álsizdigi baıqalyp otyr.

– Mundaı jaǵdaılarda bizdiń mamandar mekenjaılar boıynsha baryp, aqaýlardy anyqtap, máseleni sheshýmen aınalysady. Jaǵdaı baqylaýda, – dedi «Semeı Vodokanal» KMK qoǵammen baılanys bóliminiń basshysy Talǵat Madııarov.

Eske salsaq, buǵan deıin Semeıde sý qubyrlaryna dezınfektsııalaý jumystary júrgiziletindigine baılanysty barlyq mektepte sabaq qashyqtan ótkendigi habarlanǵan.