Semeıdiń týrıstik logotıpi paıda boldy
SEMEI. QazAqparat - Semeı qalalyq dene shynyqtyrý jáne sport bóliminiń basshysy Murat Qurjyqaev shahardyń jańa týrıstik logotıpin tanystyrdy. Bul týraly QazAqparat Semeı aqparattyq ortalyǵyna silteme jasap habarlaıdy.
Bıylǵy jyldyń aqpan aıynda qalanyń úzdik týrıstik logotıpine konkýrs jarııalanǵan bolatyn. Baıqaýǵa kelip túsken 20 eskızdik joba arasynan Ádilbek Qaısanovtyń jumysy úzdik dep tanyldy. Jas dızaınerge týrıstik fırmalar atynan 100 myń teńge kólemindegi aqshalaı syılyq berildi.
Týrıstik logotıpte aǵylshyn tilinde «Qazaqstannyń mádenı astanasy Semeıge qosh keldińiz» dep jazylǵan. Onyń negizgi túsi - jasyl. Ol qalany qorshap turǵan qaraǵaıly ormandy beıneleıdi. «E» áripteriniń biri qolyndaǵy pıalasy bar adamnyń beınesine uqsaıdy. Bul - qonaqjaılyqtyń sımvoly. «M» árpi aspaly kópirge uqsaıdy. Sonymen qatar logotıpte eldiń sımvoly - Kún bar.
«Qazir Semeı týraly jarnamalyq beınerolıkter daıyndap jatyrmyz. Olardy áleýmettik jeliler, sonyń ishinde sheteldik platformalar arqyly taratamyz. Ol jóninde áriptestermen kelisim bar. Jańa týrıstik logotıp barlyq beınerolıkterge ornalastyrylady»,- dedi Murat Qurjyqaev.
Esterińizge sala keteıik, jyl basynda qalalyq sport bólimi janynan týrızm sektory quryldy. Qazir mamandar óńirge sheteldik týrısterdi tartý boıynsha jobalardy ázirleýde. 2018 jyly Semeı qalasyna 7 500-den astam týrıst keldi.
