Semeıdiń túbinde Ertis ormandary janyp jatyr

SEMEI. QazAqparat - Abaı oblysynda Semeı qalasyna qarasty Ozerkı aýyl okrýginde dala órti tutandy, dep habarlaıdy QazAqparat oblystyq tótenshe jaǵdaılar departamentine silteme jasap.

22 qazan kúni saǵat 20:00-de «Semeı ormany» kezekshi dıspetcheri «101» pýltine habarlasqan.

Aıtýynsha, Ozerkı aýyl okrýginde qurǵaq shóp, butalar janyp jatyr.

Oqıǵa ornyna kelgen azamattyq qorǵaý organdarynyń qyzmetkerleri aqparatty rastady. Ertis ormanshylyǵynyń ashyq aýmaǵynda 30 gektar qurǵaq shóp janyp jatty.

Kashtak ormanshylyǵynan 23 adam, onyń ishinde 5 bala Kashtak aýylyna evakýatsııalandy.

Órt 23 qazan tańǵy saǵat 05:20-da oqshaýlandy.

Abaı oblysy TJD-dan orman órtin sóndirýge 32 qyzmetker men 8 tehnıka, «Semeı ormany» rezervatynan 40 adam jáne 15 tehnıka, Semeı qalasy men Ozerkı aýyldyq okrýginen 13 adam jáne 5 tehnıka, sondaı-aq, bir polıtseı men avtokólik jumyldyryldy.

Qazirgi ýaqytta órttiń aýdany 35 gektardy qurady, onyń ishinde shamamen 5 gektary - orman.

Dala órtin sóndirý úshin Kashtak, Talıtsa, Ertis ormanshylyǵynan 17 qyzmetker, 4 tehnıka jumys istep jatyr.

Tilsiz jaýmen kúres jalǵasyp jatyr.