Semeıdiń «oń jaǵalaýynda» 118 Gkal jylý tapshylyǵy bar

SEMEI. QazAqparat – Ortalyq kommýnıkatsııalar qyzmetiniń kóshpeli brıfıngisinde Abaı oblysynyń ákimi Nurlan Uranhaev Semeı qalasynyń jylý máselesi qalaı sheshilip jatqanyn baıandady, dep habarlaıdy QazAqparat tilshisi.

«Infraqurylymdyq sıpattaǵy problemalardy sheshýge erekshe nazar aýdarylyp keledi. Eń mańyzdy máselelerdiń biri – jylýmen jabdyqtaý. Semeı qalasynyń oń jaǵalaýynda 118 Gkal jylý energııasynyń tapshylyǵy bar. Jylý qýatyn 40 Gkal-ǵa ulǵaıtý maqsatynda «Ǵabbasov» jáne «Ortalyq» qazandyqtaryn qaıta jańartý júrgizilip jatyr», - dedi ákim.

Ákimdiktiń deregi boıynsha, oblystaǵy 455,2 shaqyrym jylý jelisiniń 63,8% tozǵan.

«Jylý jelileriniń tozýy – salanyń basty problemalarynyń biri. Jeliniń shamamen 290 shaqyrymy qaıta jóndeýdi qajet etedi. Qalany jylýmen jabdyqtaý máselesin sheshý úshin 2023-2024 jyldary oblysty damytýdyń keshendi josparyna jylý kózderin qaıta jańǵyrtý baǵytynda 11 joba, jelilerdi jańǵyrtýdyń 19 jobasy engizildi. Olardy iske asyrýǵa respýblıkalyq bıýdjetten 150,4 mlrd teńge qajet. Investorlar esebinen 23 joba boıynsha jobalaý-smetalyq qujattama ázirleý jumystary júrgizilip jatyr. Bul bıýdjet qarajatynan 2,2 mlrd teńge únemdeýge múmkindik berdi. Jobalardyń smetalyq jalpy quny 105,5 mlrd teńge. Úkimetpen birlesip atalǵan jobalardy iske asyrýǵa bıýdjetten qarajat bólý máselesi pysyqtalyp jatyr. «Samuryq-Energo» aktsıonerlik qoǵamy jylý-elektr ortalyǵy qurylysynyń tehnıkalyq-ekonomıkalyq negizdemesin ázirleý jumystaryn bastady. Ol jumysty jyl sońyna deıin aıaqtaý josparlanyp otyr», - dedi Nurlan Uranhaev.