Semeıdi damytýdyń úsh jyldyq arnaıy jospary qabyldandy
ASTANA. QazAqparat - Semeıdi damytýdyń úsh jyldyq arnaıy jospary qabyldandy. Bul týraly oblystyq ákimdiktiń Semeıde ótken qalanyń áleýmettik-ekonomıkalyq damýyna arnalǵan kóshpeli májilisinde belgili boldy.
«2019 jylǵa deıin Semeı qalasynyń barlyq kósheleri men demalys oryndary kórkeıtilip, jylý júıeleri jańartylyp, kázir júıeleriniń máseleleri sheshilip, 300 myń sharshy metr turǵyn úı paıdalanýǵa berilip, 5 myń oryndyq mádenı-sporttyq keshen salynady. Osy jáne basqa da aýqymdy oń ózgerister Semeıde aldaǵy úsh jylǵa arnalǵan damý josparynyń aıasynda iske asyrylady», dep habarlaıdy oblystyq ákimdiktiń baspasóz qyzmeti.
«Semeıdi damytýǵa arnalǵan úsh jyldyq jospar qalanyń erekshelikteri eskerilip, qolaıly jaǵdaılar jasaýǵa baǵyttalǵan. Osyǵan deıin oblystyq bıýdjetke aýdarylatyn qarajat, qalalyq bıýdjette qaldyrylyp keledi. Sońǵy úsh jylda qala bıýdjeti 55 %-ǵa artqan. Biz, qala basshylyǵynan Jospardy iske asyrýǵa óte jaýapkershilikpen qaraýdy talap etemiz! Suraý qatań bolady. Kún saıyn óz ákimderińizden talap etińizder!»- dedi, oblys ákimi Danıal Ahmetov.
2017-2019 jyldarǵa arnalǵan Semeıdi damytýdyń aýqymdy jospary negizgi 4 baǵytty qamtıdy. Bul turǵyn úı qurylysyn, áleýmettik salany, ishki ınfraqurylymdy, turǵyn úı-kommýnaldyq sharýashylyǵyn jańǵyrtý. Aýqymdy ózgertýlerdi iske asyrýǵa túrli qarjy kózderinen 113 mlrd. teńge jumsalatyn bolady.
Jyl saıyn qalanyń joldaryn jóndeýge 1 mlrd. teńge baǵyttalatyn bolady. Úsh jylda uzyndyǵy 75 km 48 kóshe jóndeledi. Semeıdi damytý josparynda Eýropalyq qaıta qurý jáne damý bankinen qarajat tartý qarastyrylýda. Investıtsııa esebinen 25,7 km jylý júıeleri jańartylyp, eski qurylǵylar aýystyrylady. 2016 jyly Eýropalyq qaıta qurý jáne damý bankiniń kómegimen 2,6 mlrd teńgege 17 km jylý júıeleri aýystyryldy.
Sýmen qamtamasyz etý jáne káriz júıeleri de jańǵyrtylmaq. Sonymen qatar, uzaq ýaqyt boıy qala turǵyndaryn alańdatqan uzyndyǵy 1,6 km quraıtyn kárizdik dıýker jóndeledi.
Semeıdiń áýejaıy kúrdeli jóndeýden ótkiziledi. Ushý-qoný jolaǵy uzartylyp, halyqaralyq talaptarǵa sáıkestendiriledi. Jobanyń jalpy quny 10,4 mlrd teńge.
Semeı qalasynda qurylys salasy damı túspek. Ótken jyly 51,2 myń sharshy metr bolatyn 12 kóppáterli úı salyndy. Biraq, bul da azdyq etýde. Semeıdi damytý josparyna sáıkes kóppáterli turǵyn úılerdiń qurylysy men olarǵa ınjenerlik jelilerdi tartý úshin túrli qarajat kózderinen 28,1 mlrd teńge jumsalmaq.
Kópqabatty turǵyn úı qurylysy tolyqtaı Qaraǵaıly shaǵyn aýdanynda júrgiziledi. 18 kópqabatty úıdiń qurylysy 11,1 mlrd teńge kóleminde damý ınstıtýttarynyń qarjysyn tartý esebinen júrgizilmek. 20 úıdiń qurylysyna 9,5 mlrd teńge kóleminde respýblıkalyq jáne oblystyq bıýdjetterden qarjy bólinedi.
Sonymen qatar, qalanyń Qaraǵaıly shaǵyn aýdanynda 2017 jyly biregeı «Abaı Arena» mádenı-sporttyq ortalyǵynyń qurylysy bastalmaq.
