Semeıdi damytý baǵytynda 56 joba iske asyrylmaq
Bul jaıly ShQO ákimi Danıal Ahmetov Facebook jelisindegi jeke paraqshasynda jazdy.
«Semeı qalasynyń ákimimen jáne birqatar basqarma basshylarymen keńes ótkizdim. Shahardyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn talqyladyq. Turǵyn úı-kommýnaldyq sharýashylyq, energetıka, kólik, bilim berý, sport jáne mádenıet salalaryna qatysty 56 joba irikteldi. Bıyl 32 jobany aıaqtaý josparlanǵan», - dedi ol.
Danıal Ahmetovtiń aıtýynsha, onyń ishindegi eń mańyzdylary – barlyq jylytý qazandyqtaryn jóndeý, avtojol kópirin jańartý, jaqyn mańdaǵy eldi mekender men burynǵy aýdan ortalyqtaryna baratyn joldardy jóndeý.
«Sonymen qatar jańa nysandar salynady. Olardyń qataryna arnaıy tehnıka qurastyrý tsehy men 1200 basqa arnalǵan taýarly sút fermasy kiredi. 70 kóppáterli turǵyn úıdiń qurylysy qarqyndy júrýde. «Birqabatty Shyǵys» baǵdarlamasy oıdaǵydaı iske asyp jatyr. Qalany jylýmen qamtýǵa qatysty alty joba erekshe baqylaýda. Solardyń biri – jańa mektepterdi qoldanystaǵy jylý jelilerine qosý», - dedi oblys ákimi.
Áleýmettik salada Prırechnoe aýylyndaǵy klýbty jóndeý josparlanǵan. Sondaı-aq Ertis ózeniniń jaǵalaýyn nyǵaıtý jumystary bastaldy. Bul jumystar sý tasqyny bolatyn kezge deıin aıaqtalady.
«Ókinishke qaraı, belgili sebeptermen toqtatylǵan birqatar joba bar. Qala ákimine bir aptanyń ishinde qarjylandyrýdy, ınvestorlardy, jumystyń tıisti kestege sáıkes júrý-júrmeýin taldap, ár joba boıynsha jospar daıyndaýdy tapsyrdym. Biz qaı jobaǵa erekshe nazar aýdarý kerektigin naqty bilýimiz kerek», - dedi Danıal Ahmetov.
