Semeıdi damytý baǵdarlamasyna taǵy 111 mlrd teńge qajet – ShQO ákimi

SEMEI. QazAqparat – Shyǵys Qazaqstan oblysynyń ákimi Danıal Ahmetov erteń qurylatyn Abaı oblysynyń ortalyǵy – Semeı qalasyn damytý baǵdarlamasyna taǵy 111 mlrd teńge qajettigin málimdedi, dep habarlaıdy QazAqparat tilshisi.

8 maýsym – Qazaqstanda Abaı oblysy qurylatyn kún. Jańa óńirdiń ortalyǵy Semeı shahary bolmaq.

ShQO ákimdiginde ótken jınalys barysynda aımaq basshysy Danıal Ahmetov Semeıdi damytý baǵdarlamasy 2019 jyldan beri iske asyrylyp kele jatqanyn aıtty.

«Bul baǵdarlama Prezıdent Qasym-Jomart Toqaevtyń tapsyrmasymen qurylǵan bolatyn. Oǵan 260 mlrd teńge bólindi. Osy ýaqytqa deıin jospar 40 paıyzǵa oryndaldy. Bolashaq Abaı aýdanynyń ortalyǵy damı túsip, jańa nysandar boı kóterip keledi. Máselen, búkil Azııa keńistigindegi biregeı medıtsınalyq mekeme – radıonýklıdtik ortalyq boı kóterdi», - dedi ol.

Oblys ákiminiń aıtýynsha, atalǵan baǵdarlamany iske asyrýǵa qosymsha 111 mlrd teńge qajet. Tıisti jospar ázirlengen.

«Jańa oblystyń medıtsınasy elimizdegi eń úzdikterdiń biri bolary sózsiz. Aımaqta medıtsına deńgeıi jaǵynan Aıagóz qalasymen básekege túse alatyn aýdan ortalyǵy joq. Ondaǵy 34 dáriger shetelde biliktilik arttyryp, kúrdeli otalardy jasaýdy úırendi», - dedi Danıal Ahmetov.

Esterińizge sala keteıik, osyǵan deıin Abaı oblysynyń ortalyǵy bolatyn Semeıdiń ınfraqurylymy jaqsaratynyn habarlaǵan edik.