Semeıdegi jylytý qazandyqtary qyrkúıektiń ortasyna deıin jańartylady

SEMEI. QazAqparat – ShQO ákimi Danıal Ahmetov Semeıdegi jylytý qazandyqtaryn qaıta jańartý jumystarymen tanysty, dep habarlaıdy QazAqparat tilshisi.

Jóndeý jumystary qyrkúıek aıynyń ortasyna deıin aıaqtalady dep josparlanǵan. Aımaq basshysy Danıal Ahmetovtiń aıtýynsha, osylaısha 1 mlrd teńgeden astam qarajat ıgeriledi.

«Kelesi jylǵa josparlaǵan modernızatsııalaýdy bıyl aıaqtaý úshin taǵy bir mlrd teńge bólinedi. Sonyń nátıjesinde Ortalyq qazandyǵyna qosymsha 20 Gkal beriledi. Negizgi mindet – jylý jelilerin retteý jáne gıdravlıkalyq rejımdi saqtaý», - dedi ol.

Oblys ákiminiń sózinshe, jylý berý jáne keri qaıtarylymdaǵy qysymnyń tómendeýi tehnıkalyq normatıvterge sáıkes bolýy kerek.

«Bul máselemen «Teplokommýnenergo» mekemesi jáne qala ákimdigi aınalysýda. Sońǵy jyldary alǵash ret barlyq qalpyna keltirý jumystaryn jańa jylǵa deıin aıaqtaımyz. Bul bizge qalanyń jylý rejımin retke keltirýge múmkindik beredi», - dedi Danıal Ahmetov.