Semeıdegi jylytý qazandyqtary qaıta jańartýdy qajet etedi
SEMEI. QazAqparat – Semeı qalasyndaǵy jylytý qazandyqtary qaıta jańartýdy qajet etedi, dep habarlaıdy QazAqparat tilshisi.
ShQO Energetıka jáne TÚKSh basqarmasynyń basshysy Almat Aqyshovtyń aıtýynsha, shahardaǵy jylýmen qamtý obektilerin jóndeý boıynsha jumys jospary bekitilgen. Sonyń nátıjesinde 2023 jylǵa deıin jylý máselesi túbegeıli sheshimin tappaq.
«Qazirgi ýaqytta jergilikti bıýdjetten «35 kvartal» qazandyǵyn, jylý pýnktterin jáne «103-103A» qazandyǵyn jóndeýge qarajat bólindi. Tıisti baıqaýlar jarııalandy. Sondaı-aq 2021 jyldyń 1 qyrkúıegine deıin barlyq jóndeý jumystarynyń kestesi jasaldy», - dedi ol.
Sarapshylardyń sózinshe, jylytý qazandyqtary qaıta jańartýdy qajet etedi. Osy rette Shyǵys Qazaqstan oblysynyń ákimi Danıal Ahmetov atalǵan basqarma basshysyna, Semeı qalasynyń ákimine, «Teplokommýnenergo» mekemesine jáne óziniń orynbasary Baqytjan Baıahmetovke gıdravlıkalyq rejımdi egjeı-tegjeıli zerdeleý úshin brıgada qurýdy tapsyrdy. Aımaq basshysy atap ótkendeı, másele joǵary temperatýranyń jetispeýshiliginde emes, qysymnyń tómendeýinde.
