Semeıdegi jylý máselesi: Aqaý joıylyp, jylý turaqty berilip jatyr

SEMEI. QazAqparat – Semeı qalasyndaǵy «Qaraǵaıly» shaǵyn aýdanyndaǵy úılerde jylý máselesi sheshimin tapty, dep habarlaıdy QazAqparat tilshisi.

Birneshe kún buryn «Qaraǵaıly» shaǵyn aýdany turǵyndary úıleriniń salqyn ekenin aıtyp shaǵymdanǵan.

Anyqtalǵandaı, buǵan jertóledegi jylý pýnkterinen aqaý shyǵýy sebep bolǵan.

Osyǵan oraı qala ákimi Nurbol Nursaǵatovtyń tapsyrmasymen №3 jylytý qazandyǵy arqyly jylý qýaty arttyrylyp, jertóledegi aqaý joıyldy.

Qazir jylý turaqty berilip jatyr.

«Alaıda birneshe úıdiń turǵyndary qabyrǵalarynda jaryqshaqtar paıda bolyp, terezelerinde qyraý qatyp turǵandyǵy týraly aıtýda. Búgin Semeı qalasynyń qurylys bóliminiń tehnıkalyq qadaǵalaý sarapshysy jáne «TeploKommýnEnergo» MKK jylý ınspektsııasynyń ókilderi Qaraǵaılydaǵy úılerge tehnıkalyq tekserister júrgizedi. Tehnıkalyq qorytyndylar jasalǵannan keıin úılerdi turǵyzǵan merdiger kompanııalar anyqtalǵan kemshilikterdi joıady», - dep habarlady qala ákimdiginiń baspasóz qyzmeti.