Semeıdegi joldardyń 60 paıyzy jóndeýdi qajet etedi
Bul týraly Semeı qalasynyń ákimi Nurbol Nursaǵatov Álıhan Smaıylovqa shahar joldarynyń jaǵdaıy jaıynda jasaǵan baıandamasynda aıtty.
«Qalanyń ishinde 756 shaqyrym jol bar. Asfalttalǵany - 306 shaqyrym. ıAǵnı, 40 paıyz. Onyń 9,1 paıyzyn jóndeý kerek. Semeıde asfalt tóselmegen 703 kóshe bar. Bul degenimiz 450 shaqyrym. Demek, shahardaǵy kóshelerdiń 60 paıyzy asfalttaýdy qajet etedi. 110 shaqyrymǵa qıyrshyq tas tóselgen. 340 shaqyrym qara jol. 2023 jyly qalalyq jáne oblystyq bıýdjetten qala joldaryn jóndeýge 4 mıllıard teńge bólindi. 60 shaqyrymdy quraıtyn 40 kóshe ortasha jóndeýden ótedi. Budan bólek kvartal ishilik joldar jóndeledi jáne birneshe kósheniń joldaryna aǵymdaǵy jóndeý júrgiziledi. Jalpy alǵanda, bıyl 75 shaqyrym joldy jańartýdy kózdep otyrmyz. Munyń ózi azdyq etedi», - dedi qala ákimi.
Premer-Mınıstrge Semeıdegi aspaly kópirdiń qazirgi jaǵdaıy týraly da baıandaldy. 2000 jyly japondar tartý etken kólik ótkeli salynǵaly beri birde-bir ret jóndeý kórmegen. Ótken jyly sheteldik mamandar nysandy tekserýden ótkizip, saraptama qorytyndysyn jarııalaǵan bolatyn. Sarapshylardyń aıtýynsha, kópirdegi 90 metrlik baǵanalardy jalǵaıtyn negizgi kabelder toza bastaǵan. Onyń syrtyn sýǵa tózimdi materıalmen qaptaý kerek. Kópirdiń asfalt jabyndysy da tolyq jańalaýdy qajet etedi. Nysanǵa kúrdeli jóndeý júrgizýge Abaı oblysynyń áleýmettik-ekonomıkalyq damýynyń keshendi jospary aıasynda 5 mıllıard teńge bólý josparlanǵan.
Úkimet basshysy Semeıdegi joldardyń 60 protsentten astamy standarttarǵa sáıkes kelmeıtinin aıtyp, buǵan respýblıkalyq bıýdjetten 7 mıllıard teńge qarjy bólingenin jetkizdi.
«Aspaly kópirdi jóndeý úshin mınıstrlikpen birlesip jumys isteý kerek. Tıisti qujattardy daıyndap, bıýdjet protsesine engizý qajet. Avtojoldardy ary qaraı keńeıtý kerek. Ol úshin Indýstrııa mınıstrligimen tize qosa otyryp barlyq qujattardy daıyndańyzdar. Sosyn bıýdjet protsesinde qarastyratyn bolamyz», - dedi Álıhan Smaıylov.
Álimhan Álıhanuly
