Semeıdegi «jańa kópirdi» japondardyń ózi jóndeıdi dep oılaımyn – oblys ákimi

SEMEI. QazAqparat – Abaı oblysynyń ákimi Nurlan Uranhaev Ortalyq kommýnıkatsııalar qyzmetiniń kóshpeli brıfıngisinde Semeıdegi «jańa kópirdi» kim jóndeýi múmkin ekenin aıtty, dep habarlaıdy QazAqparat tilshisi.

«Qaladaǵy eski avto-júk kólik kópiri týraly aıtsaq, jaǵdaıyn bilesizder. Zertteýden keıin shekteý qoıylǵan. Salmaǵy 2,5 tonnadan aspaıtyn kólik qana júrýge bolady. Keleshekte ony jaıaý júrginshi kópiri etýdi josparlap otyrmyz. Janynan byltyr jańa kópirdiń qurylysy bastalǵan. Búgingi tańda ınjenerlik jelilerdi tarttyq. Shákárim dańǵylynda kóp jer qazyldy. Bıylǵa bıýdjetten 7,2 mlrd teńge bólindi. Qazir kópir tireginiń qurylysyna daıyndyq júrip jatyr. 2025 jylǵa deıin kópirdi salyp bitirýimiz kerek», - degen ákim el arasynda «jańa kópir» atalyp ketken aspaly alyp kópirdiń jaǵdaıyna da toqtaldy.

«Byltyr japondar kelip, zertteý júrgizdi. Qazir tehnıkalyq tapsyrma bar. Ne isteý kerektigin túsinip otyrmyz. Tehnıkalyq tapsyrma negizinde Semeı qalasy ákimdigi jobalaý-smetalyq qujattaryn ázirlep jatyr. Sol bitken soń jumys qolǵa alynady. Bul jerde kópirdiń qańqasy ǵana emes, betindegi asfalt jabyny da jóndeledi. Jyl saıyn asfalt jańalanǵanymen dirildiń kesirinen búline beredi. Sondyqtan bul jumystyń bárin osyǵan deıin aınalysqan japonııalyq kompanııa atqarady dep oılaımyn. Naqty kim ekenin aıta almaımyn. Óıtkeni konkýrs qorytyndysy anyqtaıdy. Biraq japonııalyq mamandarmen sóılesip otyrmyz. Birneshe ret sóılestik, orynbasarlarym, tıisti basqarma basshylary, ózim de baılanystamyn. Jyl aıaǵyna deıin jobalaý-smetalyq qujattamasyn bitirsek, kelesi jyly jóndeý júrgizemiz», - dedi Nurlan Uranhaev.