Semeıdegi zaýyt jyl sońyna deıin 200 avtobýs qurastyratyn bolady
SEMEI. QazAqparat - Elimizde byltyrdan beri qoǵamdyq kólikterdi jańǵyrtýǵa baǵyttalǵan jańa baǵdarlama júzege asyrylyp jatyr.
Dálirek aıtqanda jolaýshylar tasymalymen aınalysatyn kásiporyndar Qazaqstanda jasalǵan tehnıka alǵan jaǵdaıda olarǵa jeńildetilgen nesıe beriledi, dep habarlaıdy Habar24.
Semeıdegi avtobýs qurastyrý zaýyty bıyl jyl sońyna deıin 200 avtobýs qurastyrýdy josparlap otyr. Ol Semeı, Óskemen jáne Taraz qalalaryna jóneltilmek. Zaýyt bolashaqta elimizdiń basqa da óńirlerin jańa kóliktermen qamtamasyz etpek.
Avtobýs qurastyrý zaýytynda qazir qyzý naýqan. Munda uzyndyǵy 9 jáne 6 metrlik jańa tehnıkalar shyǵarylyp jatyr. Otandyq ónimniń qazaqstandyq mazmuny da 40 protsentke jetken.
Jalpy avtobýstarǵa suranys artqan saıyn jumys oryndary da kóbeıedi degen sóz. Jańa jeliniń iske qosylýymen munda 30 adam jańadan jumysqa turǵan. Zaýyt sońǵy jyldary oblystaǵy 10 shaqty oqý ornymen kelisimshart jasap, jastardy tájirıbeden ótkizýde.
Semeılik Іlııas Bekzatov oqý ornyn tamamdaı salyp, osynda jumysqa turypty.
«Kásipti meńgerip aldyq, otandyq avtobýstardy óz qolymyzben qurastyryp jatqanymyzdy maqtan tutamyz»,- deıdi ol.
«Meniń ózimniń mindetim - osy avtobýstarǵa qala turǵyndary, ıaǵnı jolaýshylar kiretin esikterdi aldymen jeke qurastyrý, odan keıin avtobýstarǵa ornalastyryp, olardyń ashylý-jabylý mehanızmderin ornalastyrý. Osy avtobýstar bizdiń zaýyttan shyqqanyna bizdiń ózimiz óte qýanyshtymyz»,-deıdi qurastyrýshy Іlııas Bekzatov.
«Buryn biz osyndaı avtobýstardy Reseıden, Qytaıdan ákeletinbiz. 500 avtobýs kiretin Qazaqstanǵa. Endi osy 500 avtobýsty Semeı qalasynda shyǵaramyz degen oıymyz bar. Úkimet aqsha beredi, avtobýs parkteri osy aqshaǵa bizden otandyq ónimdi alýǵa tıisti. Aldaǵy ýaqytta zaýyt ónimderi Úkimettik «Qoǵamdyq kólikterdi jańalaý» baǵdarlamasyna sáıkes Batys Qazaqstan, Pavlodar, Mańǵystaý oblystaryna da jetkiziledi degen jospar bar. Tapsyrys kóbeıse, kásiporynda taǵy 30 adamǵa jumys orny ashylmaq. Budan bólek, otandyq sapaly ónimge Reseıdiń kórshiles Altaı ólkesi men Novosibir oblystary da qyzyǵýshylyq bildirip otyr eken»,-deıdi kásiporynnyń bas dırektory Ásemhan Dosqojanov.
