Semeıdegi ıadrolyq medıtsına ortalyǵynda bıyl 106 naýqas emdeldi
SEMEI. QazAqparat – Semeı qalasyndaǵy ıadrolyq medıtsına ortalyǵynda 106 naýqas emdeldi, dep habarlaıdy QazAqparat tilshisi.
ShQO Aqparat ortalyǵynyń málimetinshe, Semeıde elimizdegi jalǵyz ıadrolyq medıtsına ortalyǵy jumys isteýde. Biregeı medıtsınalyq mekeme onko jáne kardıo aýrýlaryn álemdik deńgeıge dıagnostıkalaý men emdeýdi júzege asyrady. Búgingi tańda radıonýkleıdti terapııa bóliminde 106 naýqas emdelip, 378 patsıent dıagnostıkalyq zertteýlerden ótti.
«Ortalyq dárigerleri kompıýterlik tomografpen biriktirilgen pozıtrondy-emıssııalyq tomograf arqyly dıagnozdy jáne emdeýdi sáýir aıynan bastady. 50 mınýt ishinde naýqas tolyq dıagnostıkadan ótedi. Dárigerler bul arqyly aýrýdyń negizgi ornyn ǵana emes, endi damyp kele jatqan aýrýdy da kóre alady. Búgingi tańda dárigerler qańqa, búırek, qalqansha beziniń dıagnozyn sátti júrgizýde. Ortalyqtyń 6 myńǵa deıin naýqasty qabyldaý qabileti bar», - delingen habarlamada.
Radıoaktıvti ızotoptarmen júrgizilgen zertteýlerdiń dáldigi qaterli isik aýrýyn erte satysynda anyqtaýǵa, onymen tıimdi kúres júrgizýge kómektesedi.
