Semeıdegi ýnıversıtet túlekteri dıplomda ketken qateniń saldarynan jumysqa tura almaı júr
Sońǵy kúnderi áleýmettik jeliler men BAQ-ta Shákárim ýnıversıteti túlekteriniń tap bolǵan qıyndyǵy týraly jazylyp jatyr. Belgili bolǵandaı, úsh tilde beriletin dıplomnyń aǵylshyn tilindegi nusqasynda eki sózde qate ketip qalǵan.
Al qateni túzetip dıplomdy qaıta jasatý úshin biraz ýaqyt kerek. Sonyń saldarynan oqý bitire salysymen jumysqa turmaq bolǵan keı túlekterdiń oıy iske aspaı qaldy.
Atalǵan máseleniń anyq-qanyǵyn bilý úshin Shákárim ýnıversıtetine habarlasyp kórdik.
Bilim ordasynyń baspasóz hatshysy Shyryn Qaýanova bilim týraly dıplom alýshynyń qujatynda orfografııalyq qateler ketken jaǵdaıda joǵary oqý orny jaýapkershilikti óz quziretine alatyndyǵyn jáne qujat alýshynyń ótinishi boıynsha dıplom qaıtadan shyǵarylyp beriletindigin túsindirdi.
«QR Bilim jáne ǵylym mınıstriniń 2018 jyldyń 30 qazanyndaǵy Joǵary jáne (nemese) joǵary oqý ornynan keıingi bilim berý uıymdary qyzmetiniń úlgilik qaǵıdalarynyń №48 pýnktine sáıkes, «Joǵary jáne (nemese) joǵary oqý ornynan keıingi bilim berý baǵdarlamasyn ıgergenin rastaǵan jáne qorytyndy attestattaýdan ótken bilim alýshyǵa attestattaý komıssııanyń sheshimimen tıisti bilim berý baǵdarlamasy boıynsha «bakalavr» nemese «magıstr» dárejeleri nemese maman biliktiligi taǵaıyndalady jáne qosymshasy bar dıplom tegin negizde beriledi» dep kórsetilgen. Dıplomda orfografııalyq qate ketkende qujat alýshynyń ótinishi boıynsha dıplom qaıtadan shyǵarylyp beriledi. Bitirýshi túlekterdiń ózindik úlgidegi bilim týraly qujattarynda nómiri men QR kodtary kórsetilgen. Sáıkesinshe, qujat ıesi nemese jumys berýshi generatsııalanǵan nómirler men QR kodtary arqyly UBBDQ bazasynan bitirýin rastaıtyn qujat týraly aqparatty kóre alady. Mundaı jaǵdaı joǵary jáne joǵary oqý ornynan keıingi bilim berý uıymdarynda oryn alǵan jaǵdaıda qujat alýshy oqý ornynyń tıisti bólimine ótinish bildirýi kerek», - dedi ol.
