Semeıdegi traktor qurastyratyn kásiporyn qyzmetkerleriniń 96 paıyzy vaktsına alǵan

SEMEI. QazAqparat – Semeı qalasyndaǵy «SemAZ» JShS eńbek ujymynyń 96 paıyzy koronavırýsqa qarsy vaktsına aldy. Bul jaıly QazAqparat tilshisine kompanııa dırektory Marat Makıshev aıtyp berdi.

Aýyl sharýashylyǵy tehnıkalary men júk kólikterin qurastyratyn kásiporyn 2006 jyly ashylǵan. Búgingi tańda onda 352 adam jumys isteıdi.

«Eńbek ujymynyń 96 paıyzy, ıaǵnı 338 adam juqpaly dertke qarsy vaktsına saldyrdy. Jumysta maska rejımi men basqa da karantın talaptary qatań saqtalady. 8 adamda ekpege qarsy medıtsınalyq kórsetilimder bar. Qyzmetkerler ózderiniń jáne jaqyndarynyń qaýipsizdigi úshin vaktsına alý qajettigin túsingen», - deıdi Marat Makıshev.

Onyń aıtýynsha, koronavırýs pandemııasy bastalǵaly beri kompanııada shekteý talaptary qatań baqylaýda. Vırýs juqtyrý kórsetkishi kúrt ósip, Semeı qalasy «qyzyl aımaqqa» engen tusta birneshe bólim onlaın formatta jumys isteýge aýysqan.

«Bul indetti jeńýdiń jalǵyz amaly – vaktsına bolyp otyr. Álemniń eń damyǵan elderinde halyq jappaı ekpe alýda. Sonyń arqasynda karantın shekteýleri jeńildetilip, turǵyndar burynǵy ómir saltyna kóshýde. Qazaqstanda da koronavırýs juqtyrǵandar azaısyn desek bárimiz vaktsına saldyrýymyz kerek», - deıdi JShS dırektory.