Semeıdegi sý tasqynyna sebepker sanalǵan mekemeniń kinási dáleldenbedi
SEMEI. QazAqparat - Semeıdegi kóktemgi sý tasqynyna sebepker sanalǵan Sý resýrstary komıtetine qarastyErtis basseıni ınspetsııasynyń basshysynyń kinási sotta dáleldenbedi. Búgin Semeı qalalyq №2 soty qylmystyq iske qatysty sheshim shyǵardy, dep habarlaıdy QazAqparat.
Eske sala keteıik, naýryz aıynyń 28-inde Ertis ózeniniń deńgeıi kóterilip, qaladaǵy birneshe kent pen saıajaı turǵyndary sý astynda qalǵan edi.
Al ózeniniń arnasynan asýyna Shúlbi SES-ininen jiberilgen sýdyń mólsherden tys bolýy sebep bolǵan. Óıtkeni sekýndyna jiberilýi tıis 500 tekshe metr sýdyń mólsheri 1800-ge deıin artqan. Sonyń saldarynan qaladaǵy Túıemoınaq, Mırnyı, Zaton aýdandary men Bobrovka, Shyǵys saıajaıy sý astynda qaldy.
Oblys boıynsha gıdrotehnıkalyq nysandardyń jumysyn «Sý resýrstaryn paıdalanýdy retteý jáne qorǵaý jónindegi Ertis basseındik ınspektsııasy» mekemesi qadaǵalaıdy. Shúlbi SES-inen jiberiletin sýdyń kúndelikti mólsherin kóbeıtý sheshimi jergilikti atqarýshy organdarmen kelisilmedi dep, Ertis basseındik ınspektsııasynyń basshysy Murat Muzdybaevtyń ústinen QR Qylmystyq kodeksiniń 371 babynyń 2-shi tarmaǵy (Salǵyrttyq, abaısyzda aýyr zardaptarǵa ákep soqqan dál sol is-áreket) boıynsha is qozǵalǵan bolatyn.
Búgin osy iske qatysty sot otyrysy ótti. № 2 sottyń tóraıymy Janar Ysqaqbaeva Murat Muzdybaevqa taǵylǵan aıyptyń zańsyz ekenin aıtty.
Onyń aıtýynsha, bul tabıǵattyń «tosyn syıy» bolǵan.
«Іs boıynsha tergeý jumystary júrgizildi. Nátıjesinde aıyptalýshynyń óz mindetterin oryndamaǵany jáne jumysyna salǵyrt qaraý áreketteri anyqtalǵan joq. Murat Aıtkenuly Muzdybaev qylmystyq is boıynsha is-áreketteriniń joqtyǵyna baılanysty kináli emes dep tanyldy»,-dedi Janar Ysqaqbaeva.
