Semeıdegi sý tasqyny: Shúlbi SES-inen ákimdiktiń kelisiminsiz sý jiberilgen
ÓSKEMEN. QazAqparat - Semeıdegi Shúlbi sý elektr stansasynan jiberilgen sýdyń kólemi jergilikti ákimdiktiń kelisiminsiz kóbeıtilgen, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Búgin tańnan bastap Ertistiń deńgeıi kóterilýi saldarynan shaharǵa irgeles eldi mekenderge sý jaıylǵan bolatyn.
Ertis ózeniniń arnasynan asýyna Shúlbi SES-ine kóp mólsherde sý jınalýy sebep bolyp otyr.
«Buǵan deıin Shúlbi SES-inen sekýndyna 500 tekshe metr sý jiberilip kelse, búgin onyń mólsheri 1800 tekshe metrge artqan. Saldarynan Ertistiń deńgeıi 5,06 metrge kóterilgen. Al Semeı qalasy úshin atalmysh ózenniń deńgeıi 4,5 metrge jetýiniń ózi shetin jaǵdaı bolyp sanalady. Túıemoınaq araly, Mırnyı jáne Shyǵys kentterine sý sonyń saldarynan jaıyldy» - delingen resmı habarlamada.
Qazirge deıin Túıemoınaq araly aýdanynan ǵana 103 adam qaýipsiz jerge kóshirildi. Onyń 25-i bala. Araldaǵy tasqynnyń betin qaıtarý úshin 16 tehnıka jumyldyrylypty. «Vostokvzryvprom» JShS mamandary Ertistiń betindegi muzdardy jarylǵysh zatpen qoparýǵa kirisip ketken.
«Oblys boıynsha gıdrotehnıkalyq nysandardyń jumysyn «Sý resýrstaryn paıdalanýdy retteý jáne qorǵaý jónindegi Ertis basseındik ınspektsııasy» mekemesi qadaǵalaıdy. Shúlbi SES-inen jiberiletin sýdyń kúndelikti mólsherin kóbeıtý sheshimi jergilikti atqarýshy organdarmen kelisilmegen» - deıdi ákimdiktiń baspasóz qyzmetindegiler.
