Semeıdegi stadıonda jylytqyshy bar jańa alań salynady
SEMEI. QazAqparat - Semeı bıligi «Spartak» stadıonynyń aıanyshty jaǵdaıyna mán bere bastady. Olar bıyl alańǵa jańa kógal tósep, jylytý jáne ózdiginen sýarý júıelerin engizýge ýáde berdi, dep habarlaıdy QazAqparat tilshisi.
Joba-smetalyq qujattama ázirleýge baıqaý jarııalandy. Aldyn ala málimetter boıynsha, alańnyń jabyndysyn kúrdeli jóndeý kúzde bastalyp, eki aı jalǵasady.
Stadıonnyń kógaly sońǵy ret 50 jyl buryn jańartylǵan. Ábden sıregen shóp pen tozyǵy jetken júgirý jolaǵyn aýystyrý qajet-aq.
«Stadıon Birinshi lıga men Premer-lıga oıyndaryn ótkizýge Qazaqstan Fýtbol federatsııasy qoıatyn talaptarǵa saı bolýy tıis. Ol úshin jylytý jáne ózdiginen sýarý júıesi engizilip, jańa kógal tóseledi. Batys jáne shyǵys trıbýnalardyń ústin shatyrmen jabamyz. Jospar boıynsha, jaryqtandyrý júıesi jóndeledi. Budan tys, jańa júgirý jolaǵyn tóseý kerek. Trıbýnalardyń ishin, kıim almastyrý bólmelerin, jylytý júıesin de jóndeýden ótkizý qajet», - deıdi Semeı deneshynyqtyrý jáne sport bóliminiń basshysy Marat Qurjyqaev.
Qarjy bólingen soń, stadıon jabylyp, fýtbolshylar matchtaryn Óskemende ótkizetin bolady.
Deneshynyqtyrý jáne sport bólimindegiler jankúıerler de fýtbolsyz qalmaıtynyn, olardy oblys ortalyǵyna kólikpen tasymaldaý jaǵy da oılastyrylatynyn aıtady.
Stadıondy kúrdeli jóndeýge qansha qarjy bólinetini joba-smetalyq qujattamalary daıyn bolǵan soń anyqtalady.
