Semeıdegi sport keshenine Jaqsylyq Úshkempirovtiń esimi berildi

SEMEI. QazAqparat – Semeı qalasyndaǵy dene shynyqtyrý-saýyqtyrý keshenine Olımpıada chempıony Jaqsylyq Úshkempirovtiń esimi berildi, dep habarlaıdy QazAqparat tilshisi Semeı qalasynyń aqparat ortalyǵyna silteme jasap.

Dene shynyqtyrý-saýyqtyrý kesheninde ótken saltanatty sharaǵa oblys ákimi Danıal Ahmetov qatysty.

«Sport keshenine Jaqsylyq Úshkempirovtyń esiminiń berilýi meni qýantady. Ol sportta aty ańyzǵa aınalǵan tulǵa ǵana emes, eńbektiń shyńyna shyqqan qaıratker. Árbir qazaqstandyq osyndaı bolýy kerek. Kelesi jyldan bastap Olımpıada chempıony Jaqsylyq Úshkempirovtyń júldesine arnalǵan jarys ótkizýdi josparlap otyrmyz. Ol týrnır jyl saıyn balalar men jastar arasynda ótkiziledi», - dedi Danıal Ahmetov.

Semeı - sportshynyń ómirinde tereń iz qaldyrǵan qala. Olımpıada chempıony jas kezinde qart Semeıdegi zoovetınstıtýtta oqyǵan.

Jaqsylyq Úshkempirov 1951 jyly 6 mamyrda Qazaq KSR Jambyl oblysy Sverdlov aýdany «Chapaev» sovhozynda dúnıege kelgen. Ol - KSRO eńbek sińirgen sport sheberi, Qazaq KSR eńbek sińirgen jattyqtyrýshysy, klassıkalyq kúresten Olımpıada chempıony, erkin kúresten Qazaq KSR chempıony, álem chempıony (1981), álem kýbogynyń ekinshi júldegeri (1982), Eýropa chempıonatynyń ekinshi júldegeri (1980), KSRO eki dúrkin chempıony (1975, 1980), KSRO chempıonatynyń kúmis júldegeri (1978, 1979), KSRO chempıonatynyń qola júldegeri (1973, 1977) jáne KSRO halyqtarynyń spartakıadasynyń chempıony (1975).