Semeıdegi saıajaılar turǵyndary oblys ákimine shaǵymdaryn jetkizdi

SEMEI. QazAqparat – Oblys ortalyǵyna qarasty Bobrovka, Murat saıajaılaryndaǵy túıtkildi máseleler aımaq basshysynyń tikeleı baqylaýyna alynǵan. Turǵyndardy tolǵandyrǵan suraqtardy sheshý maqsatynda Nurlan Uranhaev halyqpen kezdesýler ótkizip keledi. Búgingi jıynda mamyr aıyndaǵy alǵashqy kezdesýden keıingi atqarylǵan jumystar pysyqtaldy, dep habarlaıdy QazAqparat Abaı oblysy ákiminiń baspasóz qyzmetine silteme jasap.

Jyldar boıy qordalanǵan máselelerdi sheshý úshin óńirlik ákimdik tarapynan «Jol kartasy» ázirlengen bolatyn. Soǵan sáıkes saıajaılarda jol belgileri men 4 «Sergek» kamerasy ornatylyp, 60-tan astam ruqsat etilmegen qoqys alańdary joıyldy (4 370 m3 qoqys shyǵaryldy). Sondaı-aq, 11 aıaldama ornatylyp, taǵy úsheýin aldaǵy 15 kúnniń ishinde qurý josparlanyp otyr.

Al, shilde aıynyń sońynda Bobrovka jáne Murat turǵyn alqaptarynda balalarǵa arnalǵan oıyn, sport, jeńil atletıka alańdarynyń qurylysy bastalady. Qazir turǵyn úı-kommýnaldyq sharýashylyǵy bólimi tarapynan jer telimin bólý jumystary júrgizilip jatyr.

Jıyn barysynda halyq «Jol kartasy» aıasynda atqarylyp jatqan jumystarǵa óz rızashylyqtaryn bildirdi. Desek te, basym bóligi «Semeı. Murat. Doverıe» jáne «Bobrovka» ÁBTK jergilikti qoǵamdyq birlestiginiń qyzmetine qatysty shaǵymdaryn ashyq jetkizdi. Turǵyndardyń aıtýynsha, kooperatıv tóraǵalary qyzmettik ókilettikterin qoldanyp, bılikti asyra paıdalanǵan.

Oblys ákimi eki kooperatıvke qatysty jumystyń barlyǵy zań aıasynda iske asatynyn jáne barlyq quzyrly organdar birlestikke qatysty máseleni sheshý baǵytynda jumystar júrgizip jatqanyn aıtty.

Bir saǵatqa sozylǵan jıyndy qorytyndylaı kele Nurlan Uranhaev jáne turǵyndar 2 tamyz kúni qaıta kezdesý ótkizýge kelisti.