Semeıdegi radıologııalyq ortalyqtyń radıoaktıvti qaldyqtar saqtaıtyn jabdyqtary talapqa saı emes - Dúısenova
ASTANA. QazAqparat - Semeıdegi radıologııalyq ortalyqtyń radıoaktıvti qaldyqtar saqtaıtyn jabdyqtary talapqa saı emes. Bul týraly búgin QR Úkimeti otyrysynda elimizdiń Densaýlyq saqtaý jáne áleýmettik damý mınıstri Tamara Dúısenova málim etti.
«Daıyndyq deńgeıi 70 paıyzdan da tómen 6 nysan bar. Onyń birinshisi Semeı qalasyndaǵy óńirlik onkologııalyq dıspanserdiń Radıologııalyq ortalyǵy. Bul nysan qurylysy 100 paıyz aıaqtalǵan deýge bolady. Biraq onda bir problema bar. Ol - radıoaktıvti qaldyqtardy jınaý jáne saqtaýǵa qoıylǵan qural-jabdyqtyń belgilengen talaptarǵa sáıkes kelmeýi. Bul máselede biz Danıal Kenjataıulymen (ShQO ákimi) tyǵyz jumys isteýdemiz, sot tekserýi aıaqtalyp keledi. Sot aıaqtalǵannan keıin biz bul nysandy qabyldaýǵa jáne onkologııalyq aýrýlardy emdeýge paıdalanýǵa daıyn bolamyz»,- dedi mınıstr.
Onyń aıtýynsha, Aqtaýdaǵy ana men balany qorǵaý óńirlik ortalyǵyna da tehnologııalyq qural-jabdyqtar jetkizilmegen. Munan bólek, dál osy qaladaǵy onkologııalyq dıspanserge qajetti medıtsınalyq tehnıkalardyń qymbattaýyna baılanysty jobalyq-smetalyq qujattamasy túzetilýde.
«Buǵan qosa, salynyp jatqan dárigerlik ambýlatorııalardyń sapasyna qatysty syn da bar. Aqmola men Shyǵys Qazaqstan oblystarynda qazirdiń ózinde erterekte jasalǵan kelisimsharttar sot sheshimimen buzyldy. Búgin qalǵan jumystardy oryndaıtyn merdiger uıymdar anyqtaldy. Almaty boıynsha da jobalyq-smetalyq qujattardy túzetý júrgizilýde», - dedi Dúısenova.
