Semeıdegi perzenthanada zamanaýı jabdyqtar qoldanylmaı beker tur

SEMEI. QazAqparat - ShQO ákimi Danıal Ahmetov Semeıge jasaǵan saparynda qalalyq perınataldy ortalyqta júrgizilip jatqan kúrdeli jóndeý barysymen tanysty, dep habarlaıdy QazAqparat tilshisi.

Jóndeý jumystaryn 780 mln teńge tenderdi jeńip alǵan Kókshetaý qalasynyń kompanııasy qolǵa alǵan. Biraq búginde sol somanyń tek 32 mln teńgesi ǵana ıgerilipti. Al jumys jospary tek 25 paıyzǵa aıaqtalǵan.

Osydan eki jyl buryn munda joǵary tehnologııalyq jabdyqtar satyp alynǵan edi. Alaıda olar qazir jaýapsyz merdigerlerdiń kinásinen qoldanylmaı bos tur.

- «Bıyl zamanaýı jabdyqtary bar perınataldy medıtsınalyq ortalyq jumysyn bastaıdy dep josparlaǵanbyz. Biraq ókinishke qaraı, merdigerlerdiń sylbyr jumysynyń saldarynan bul oıymyz iske aspaı qaldy. Endi bir ǵana jol bar - kelisimshartty sot arqyly buzý. Jańa jylǵa deıin mekemeni paıdalanýǵa bere almaıtynymyz anyq», - dedi Danıal Ahmetov.

Budan bólek, aımaq basshysy Abaı atyndaǵy teatrda júrgizilip jatqan jóndeý jumystarymen de tanysty. Jaz boıy teatr ǵımaratynyń aýmaǵy abattandyrylyp, qasbeti jańaryp, mádenıet oshaǵynyń ishki kelbeti tolyǵymen ózgerdi. Foıe men kórermen zaly da jandana tústi.

Karantın rejımi aıaqtalǵannan keıin teatr akterleri jańartylǵan sahnaǵa shyǵady. Danıal Ahmetov Abaı mýzeıine de baryp, ondaǵy rekonstrýktsııalaý jumystarynyń jaı-japsaryn súzgiden ótkizdi. Munda trotýar plıtalary aýystyrylyp, kógaldar men gúlzarlar jańa keıipke endi.