Semeıdegi órt bir adamnyń ómirin qıyp ketti
SEMEI. QazAqparat – Semeı qalasynda jeke turǵyn úıde órt shyǵyp, bir adam qaza tapty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 8 sáýirde saǵat 20.00 shamasynda Depovskaıa kóshesindegi jer úıde órt shyqqan. Oqıǵa ornyna órt sóndirýshiler shuǵyl kelip jetti.
«Qyzyl jalyn úı shatyrynyń aǵash qurylymdaryn, tereze men esikti sharpyǵan. Tilsiz jaýdyń jalpy aýmaǵy 100 sharshy metrdi qurady. Órt sóndirý barysynda qutqarýshylar bólme ishinen úı ıesiniń denesin tapty», - dep habarlady vedomstvo ókilderi.
Sonymen qatar janyp jatqan úıden syıymdylyǵy 27 lıtrlik 1 gaz ballony syrtqa shyǵarylǵan. Aldyn ala málimet boıynsha órttiń shyǵýyna – temeki shegý kezindegi abaısyzdyq sebep bolýy múmkin.
