Semeıdegi orman órtinen taǵy bir aýyl turǵyndary kóshirildi

ASTANA. QazAqparat – Abaı oblysyndaǵy orman órti qaýpinen Ozerskogo aýylynyń turǵyndary Semeı qalasyna evakýtsııalandy, dep habarlaıdy QazAqparat tilshisi oblys ákimdigine silteme jasap.

«Orman alqabyna jaqyn ornalasqan Ozerskogo aýyldyq okrýgi turǵyndarynyń qaýipsizdigin qamtamasyz etý maqsatynda olardy Semeı qalasyna evakýatsııalaý týraly sheshim qabyldandy. Aýyl turǵyndary aldyn ala uıymdastyrylǵan evakýatsııalyq pýnktterge ornalastyryldy. Ystyq tamaq jáne birinshi kezekte qajetti quraldarmen qamtamasyz etilgen. Aýyldaǵy úıler men jeke qosalqy sharýashylyqtaryn polıtsııa qyzmetkerleri kúzetedi», - delingen shuǵyl habarlamada.

Aqparatta aıtylǵandaı, Ozerskogo aýylynyń kire berisine beketter qoıyldy.

Buǵan deıin óńir ákimdigi alapat órtke baılanysty Bulaq aýylynyń turǵyndary Semeıge kóshirilgenin habarlaǵan edi.

Aıta keteıik, óńirde qurylǵan jedel shtabtyń jetekshisi Dmıtrıı Garıkov orman órti negizinen túnde sóndirilip jatqanyn aıtqan edi.