Semeıdegi orman órti: polıtsııa qaza tapqandardyń jeke basyn anyqtap jatyr

ASTANA. QazAqparat – Tótenshe jaǵdaılar mınıstrligi órtke qarsy qyzmet komıtetiniń tóraǵasy Nurbolat Derbisov Jibek Joly telearnasyna bergen suhbatynda Semeıdegi orman órtine qatysty sońǵy málimettermen bólise otyryp, qaza tapqandardyń kim ekeni anyqtalyp jatqanyn aıtty, dep habarlaıdy QazAqparat tilshisi.

«Jańa ǵana tikushaqpen áýeden jaǵdaıdy taǵy baqylap keldik. Buǵan deıin aıtqanymdaı, órtti aýyzdaýǵa jel keri áserin tıgizip jatyr. Sol sııaqty ormannyń ishine tehnıkamen kirý qıyndyq týǵyzyp tur. Jalpy jaǵdaı turaqty ári baqylaýda», - dedi Nurbolat Derbisov Jibek Joly telearnasyna bergen suhbatynda.

Sondaı-aq, telejúrgizýshi órtten qaıtys bolǵandardyń taǵdyryna qatysty saýal qoıdy.

«Suraǵyńyz oryndy. Bárimizge de ońaı bolyp turǵan joq. Órt bastalǵannan keıin orman qyzmetkerleri baılanysqa shyqpaı qaldy. Olar qoldanǵan tehnıka qaldyqtarynyń orny tabyldy. Qazir polıtsııa qyzmetkerleri olardyń jeke basyn anyqtaı boıynsha jumys júrgizip jatyr. Qaıtys bolǵandar týraly aqparatty quzyrly organdar beredi dep oılaımyz. Bizdiń qazirgi mindet – órtti aýyzdaqtap, onyń jaqyn mańdaǵy eldimekenderdi jaılaýyna jol bermeý», - deıdi ol.