Semeıdegi oqýshy ólimi – Abaı oblystyq bilim basqarmasy túsinikteme berdi
Basqarma taratqan málimetke júginsek, medıtsınalyq saraptamanyń qorytyndysy boıynsha oqýshy tamaqtyń iri kesekterine shashalyp, tynys alý jolynyń jabylýyna baılanysty mehanıkalyq asfıksııadan kóz jumǵan.
«Semeı qalasynyń psıhologııalyq-medıtsınalyq-pedagogıkalyq keńesiniń 2016 jylǵy 13 qańtardaǵy qorytyndysy negizinde bala «Jeńil aqyl-oı kemistigi» degen dıagnozben ınternatta bilim alǵan. Balanyń anasynyń estý, sóıleý qabileti tómen. Semeı qalasyndaǵy №9 mektepte eden jýýshy bolyp jumys isteıdi. Tolyq emes otbasydan shyqqan, sabaqty ortasha oqyǵan. Oqýshynyń bıologııalyq ákesi K.A balamen birge turmaǵan, biraq ulymen únemi qarym-qatynasta bolǵan. Balanyń densaýlyǵy jaqsy bolǵan, eshqashan densaýlyǵyna shaǵym bolmaǵan, biraq sýyq tıip aýyrǵan. Aptanyń dúısenbisinen jumasyna deıin №6 arnaıy mektep ınternatta jatyp oqyǵan, senbi, jeksenbi kúnderi anasy úıine alyp ketip otyrǵan» delingen Abaı oblystyq Bilim basqarmasy taratqan málimette.
Aıta keteıik, buǵan deıin Semeıde mektep-ınternatta jasóspirim oqýshynyń qaıtys bolýyna baılanysty tergeý bastalǵanyn jazǵan edik.
