Semeıdegi mýzeıde «Aqyn júrek» atty kórme ashyldy

SEMEI. QazAqparat – Semeıdegi oblystyq tarıhı-ólketaný mýzeıinde qazaqtyń shoqtyǵy bıik aqyndarynyń ataýly kúnderine oraı «Aqyn júrek» atty kórme ashyldy, dep habarlaıdy QazAqparat tilshisi.

Jambyl Jabaev, Árip Táńirbergenov, Aqylbaı Qunanbaev, Kókbaı Janataev, Shákir Ábenov, Qasym Amanjolov jáne Tursynhan Ábdirahmanova – qazaq ádebıetiniń damýyna ólsheýsiz úles qosqan qalamgerler. Kórmede olardyń ómirlik jáne shyǵarmashylyq joldarynan syr shertetin materıaldar usynylǵan. Al ekspozıtsııanyń basty ereksheligi – Shákir Ábenovtiń ózi kıgen shapany boldy. Ony jazýshynyń týystary mýzeıge ákelip tabystady.

«2021 jyl ataýly datalarǵa toly. Bıyl biz Tursynhan Ábdirahmanovanyń júz jyldyq mereıtoıyn, Qasym Amanjolovtyń 110 jyldyǵyn, Shákir Ábenovtiń 120 jyldyǵyn, Kókbaı Janataıulynyń 160 jyldyǵyn, Aqylbaı Abaıulynyń 160 jyldyǵyn, Árip Táńirbergenovtiń 165 jyldyǵyn jáne Jambyl Jabaevtyń 175 jyldyǵyn atap ótemiz. Osy aıtýly kúnderdiń qurmetine oraı, qazaq ádebıetinde eleýli iz qaldyrǵan tuǵyry bıik tulǵalardyń jeke zattary men kitaptary qoıylǵan kórmeni saltanatty túrde ashyp otyrmyz», - deıdi oblystyq tarıhı-ólketaný mýzeıiniń joǵary sanatty mamany Gúlnur Shalataıqyzy.

Onyń aıtýynsha, mýzeıge kelýshiler kórme keıipkerleri ómiriniń ajyramas bóligine aınalǵan jumys ústelderi men mýzykalyq aspaptaryn kóre alady.

Aıta keteıik, kórme 24 mamyrǵa deıin jalǵasady.