Semeıdegi mádenı-sport keshenin «Elbasy arena» dep ataý usynyldy
Semeı qalalyq máslıhatynda zııaly qaýym ókilderi, ataqty sportshylar, eńbek sińirgen qaıratkerler, ardagerler, ÚEU, BAQ ókilderi, eriktiler qozǵalysynyń belsendileri, jastar men iri kásiporyndar jetekshilerinen quralǵan bastamashyl toptyń haty qaraldy. Ol hatta Qaraǵaıly yqsham aýdanyndaǵy ataýsyz kóshege Nursultan Nazarbaevtyń esimin berý jáne osyndaǵy mádenı-sport keshenin «Elbasy Arena» dep ataý usynylǵan.
Atalmysh bastama Elbasynyń memleketti qalyptastyrýdaǵy aıryqsha róline jáne QR Táýelsizdiginiń 30 jyldyǵyna oraı kóterilip otyr. Másele qalalyq máslıhattyń turaqty komıssııasynyń qaraýyna shyǵarylyp, oǵan 10 myńnan astam adam onlaın formatta qatysty.
Qatysýshylar pikirlerin nazarǵa ala otyryp, depýtattar osy máseleni qalalyq máslıhat sessııasyna shyǵarýdy usyndy.