Semeıdegi kópqabatty úı aýlalarynyń 90%-nyń tozyǵy jetken

SEMEI. QazAqparat – Semeı qalasyndaǵy kópqabatty úı aýlalarynyń 90%-nyń tozyǵy jetken, dep habarlaıdy QazAqparat tilshisi.

Qala ákimdigi baspasóz qyzmetiniń málimetine súıensek, bıyl Semeıde 70-ke jýyq kópqabatty turǵyn úı aýlasynyń aýmaǵy abattandyrylmaq. Qazirgi tańda 343 kvartal men Glınkı kóshelerindegi aýlalarda jóndeý jumystary bastaldy.

Shahar basshysy Nurbol Nursaǵatov merdigerlermen birge qurylys jumystarynyń barysyn tekserdi.

«Aýlalardy jańartpas buryn, jer astyndaǵy jelilerdi retke keltirý kerek. Sebebi basty másele abattandyrý jumystary aıaqtalǵannan keıin týyndaýy múmkin. Merdigerler jumystardyń sapaly júrgizilýine mán berýleri tıis», - dedi ákim.

Aıta keteıik, Semeıde barlyǵy 576 aýla bar. Onyń 90%-nyń tozyǵy jetken. Jyl saıyn aýlalardy kezeń-kezeńimen jóndeý josparlanýda.