Semeıdegi kolledj ǵımaraty quqyq qorǵaý organdaryna berilmeıdi – ShQO bilim basqarmasy
Kesheli beri áleýmettik jeliler men buqaralyq aqparat quraldarynda jańadan qurylatyn Abaı oblysynyń ortalyǵyna aınalatyn Semeıdegi Geodezııa jáne kartografııa kolledjiniń ǵımaraty quqyq qorǵaý organdaryna beriletindigi jaıly habar tarady. ShQO bilim basqarmasy buǵan qatysty resmı málimdeme jasady.
«Óńirdiń Abaı jáne Shyǵys Qazaqstan oblystary bolyp ekige bólinýine baılanysty Bilim basqarmasy tehnıkalyq jáne kásiptik bilim berý júıesin odan ári jańǵyrtý maqsatynda vedomstvolyq baǵynysty mekemelerge taldaý jasap jatyr. Osy jumys aıasynda Semeı qalasyndaǵy kolledj ǵımarattarynyń materıaldyq-tehnıkalyq bazasyna monıtorıng júrgizilip jatyr. Búgingi tańda kolledjderdi jabý, ǵımarattardy alyp qoıý máselesi talqylanyp jatqan joq», - delingen aqparatta.
Vedomstvo dereginshe, Semeıdegi TjKB júıesindegi bilim ordalary daıyndap jatqan mamandyqtar oblystyń da, respýblıkanyń da eńbek naryǵynda suranysqa ıe.
«Kolledjderdiń óz salalarynda aldyńǵy qatardaǵy mamandardy daıarlaýda kóp jyldyq tájirıbesi bar. Bul kolledjderdiń túlekteri oblystaǵy jáne respýblıkadaǵy kásiporyndarǵa jumysqa ornalasady. Semeıdegi barlyq kolledj stýdentteri ádettegideı oqýyn jalǵastyryp, oqyǵan mamandyǵy boıynsha oqý ornyn bitirgeni týraly dıplom alady. Muǵalimderdiń, stýdentterdiń jáne olardyń ata-analarynyń bul týraly alańdaýyna esh negiz joq. Másele baqylaýda», - delingen habarlamada.
Osyǵan deıin Semeı óńirin damytýǵa sońǵy jyldary 354 mlrd teńge ınvestıtsııa tartylǵanyn jazǵan bolatynbyz.
Sýret: ulysmedia.kz