Semeıdegi qoǵamdyq kólik máselesi: Ákimdik avtobýstardyń toqtap qalmaıtynyn jetkizdi
SEMEI. QazAqparat – Semeı qalasynyń ákimi Nurymbet Saqtaǵanov qandaı jaǵdaı bolmasyn qoǵamdyq kólikterdiń toqtap qalmaıtyndyǵyn aıtty, dep habarlaıdy QazAqparat tilshisi.
Sońǵy kúnderi BAQ-ta jáne áleýmettik jelilerde Semeıdegi avtobýs parkindegi qordalanǵan máseleler qyzý talqyǵa túsken. Qoǵamdyq rezonansqa oraı Shyǵys Qazaqstan oblysynyń ákimdigi baspasóz máslıhatyn ótkizdi. Oǵan ShQO ákiminiń birinshi orynbasary Almashan Smatlaev, Semeı qalasynyń ákimi Nurymbet Saqtaǵanov jáne shahardyń burynǵy basshysy Ermak Sálimov qatysty.
2019 jyly qala turǵyndary tarapynan jolaýshylar tasymalynyń sapasy men avtobýstardyń jaı-kúıine qatysty shaǵymdardan keıin óńir ákimdigi «QDB-Lızıng» AQ arqyly avtobýstardy jańartý týraly sheshim qabyldaǵan. Osylaısha «SEMEY BUS» JShS kásiporny qurylyp, 4,2 mlrd teńgege 170 avtobýs satyp alyndy. Bızneske túsetin salmaqty azaıtý úshin ákimdik jobany birlesip qarjylandyrýǵa 633 mln teńge bóldi.
Statıstıkalyq málimetterge sáıkes, jańa avtobýstar satyp alǵanǵa deıin jeke tasymaldaýshylar jolaýshylar aǵynyn jylyna 17 mln adam dep kórsetti. Almaty kólik jáne kommýnıkatsııalar ǵylymı-zertteý ınstıtýtynyń mamandary júrgizgen taldaýdan keıin naqty jyldyq jolaýshylar aǵyny 57 mln adam ekeni belgili bolǵan. Bul lızıng arqyly jobany júzege asyrý týraly sheshim qabyldaýdaǵy negizgi faktorlardyń biri boldy. Óıtkeni esepteýler boıynsha joba ekonomıkalyq turǵydan tıimdi.
«Alaıda «SEMEY BUS» JShS qıyn jaǵdaıǵa tap boldy. Kásiporyn qyzmetkerleri jalaqyny ýaqtyly ala almaıdy, zeınetaqy jáne áleýmettik aýdarymdar júrgizilmeı qaldy. Osylaısha, qaryz somasy 168,5 mln teńgeni quraǵan. Ákimdiktiń aralasýy nátıjesinde qaryz óteldi. Sonymen qatar kásiporyn bıýdjetke salyq tólemeıdi. Qaryz 316 mln teńgege jetti. Kompanııanyń esepshotyna tyıym salynýy da múmkin», - dedi Almashan Smatlaev.
Sonymen qatar satyp alynǵan 170 jańa avtobýstyń nebári jarty jyldan keıin 30-ǵa jýyǵy buzylyp, júrmeı qalǵan. Al búgingi tańda 70-ke jýyq avtobýs synǵan. Qalada qoǵamdyq kólikter toqtap qalmas úshin ákimdik qajetti sharalardy qabyldaýda.
«Aldaǵy ýaqytta Semeı qalasy máslıhatynyń kezekten tys sessııasy ótkizilip, atalǵan kásiporynǵa taǵy 500 mln teńge bólý máselesi talqyǵa salynbaq. Odan ári bul másele respýblıkalyq deńgeıde qaralatyn bolady. Tasymaldaýshylar qajetti sýbsıdııany alady dep úmittenemin. Biraq, ókinishke qaraı, qazirgi ýaqytqa deıin birde-bir ótinim túsken joq. Biz bul másele boıynsha jumys isteıtin bolamyz. Kez kelgen jaǵdaıda avtobýstar toqtap qalmaıdy. Qoǵamdyq kólikter barlyq áleýmettik mańyzy bar baǵyttar boıynsha shtattyq rejımde qatynaıdy», - dedi shahar ákimi Nurymbet Saqtaǵanov.
